لا تقرِّب..نسمح لأكابر
رايح فين لسّع بتكابر
(أولاد آدم كُلّنا فاكر)
تطلعوا من فين بس يا ساتر

هات تذكرتك..إيه فمحفظتك
لِبسك مو زي الحاضرين
اسمك طافي ماله رنين
رسمك يشكي الهم سنين
آسفين منت من المرجُوِّين

ولا حتى كُرسي على الحيط
ليه ما قصيت هادا الخيط
ومو وقتي تحكي في الدين
الحاجب ما تعلاه عين
إيش حيقولوا هدول لتنين
عنّنا لو دخّلناك جُوّه
ابعد او تبعد بالقوّة

ليه الضجّه إيش يبغى هوّا
الحق يبغى يشرّف جوّه
يخُش ان قاللي
(أقوللك إيش؟)
عُمرك زرت فمرّة جنيف؟
(شغّال انا في الشتا والصيف)
اوصف لي ليالي برلين
(ما فجيبي إلا ريالين)
هه ها ناقصنا المسكين
حاندهله انا الشرطة دحين

إيش بُه؟
الشيطان يلعب بُه
شايف دا اللي الخير في دربه
ومدكّن ياما على قلبه
يا ويلي لو يقعد جنبه
وشايف داك العمُه وزير
وأبوه قرّر يبقى سفير
واللي ان ضايقه حد يطير
إيوة!!
ما ارتاحله ولا حبّه
قال إيه ما يحمد غير ربُّه
مصيبة..أمثالك يتخبّوا
دا غشيم جايينا برجليه
وماسك لي سبحة في ايديه
طيّب قوللي
(أقوللك إيه؟)
لبسك دا من فين شاريه
أمي تخيّط وتسوّيه
وقماشه من الشانزليزيه؟
من جاري محلّفني عليه
وزرايره أكيد طليانيه
ايوه صحيح..يارب اشفيه
أما الجزمة..اخلعها ثواني
أي...هاتولي اللي يربيه
وكمان جزمة ميد ان تايواني
يا خسارة وقتي ضاع فيه
إيش جابك لاعتاب الصفوة
(فهّمتوني إننا إخوة)
صدّقني كنّا نسلّيكم
وجنابك صدّقت السلوة
جاي من حفرة تروم الربوة!!
(انتو خلقتولنا دي الفجوة)
(والصّاعد منّنا ترموه)
جرّبت استعمال القسوة؟
(تفرق ايه الحي كفنتوه)

ولا حتى كرسي على الحيط
ليه ما قصيت هادا الخيط
ومو وقتي تحكي في الدين
الحاجب ما تعلاه عين
إيش حيقولوا هدول لتنين
عنّنا لو دخّلناك جُوّه
ابعد او تبعد بالقوّة