*"أنا والشعر*
الشعر مش مركبي.. والقافية مش مجاديفي
لاسكتى معاهم.. ولا فكرى وتصريفي..
لكن شيطانهم غلبنى.. بقا سَمْتى وتعريفي
ولقيتنى بركب الموجة.. بفنى وتحريفي..
.....
بقيت شاعر بلف البلاد وأجوب البحور..
قال عنى سكان العشش وأصحاب القصور
ساحر شيطان.. فاجر.. يغور
.....
وقالوا ان شعرى.. عهر وبواح.
وان قصايدى خطايا وسفاح
بغازل بشعرى الصبايا الملاح
وأراود العجايز بخفض الجناح
.....
والشعر بقا كيفي صُحبتى وكاسي
ومراتى وولادى ودنيتى وناسي
وبحرى فى الترحال.. وبرى لو راسي
.....
ياشعر يامعشش فى الحشا والحنايا
نفسي أتوب وتفك العهد ويايا
وتبقي روحى طليقة حرة فى سمايا
وارجع لنفسى وأطلق حزنى وأسايا
.....
ياشعر ياملعون امتا الرباط ينحل
امتا تبعد عنى متكونش ليا ضل
امتا أسلاك وتصبحلى عدو مش خل
امتا همشي بثبات ولامرة قدمى يزل
....
قللى الشعر ياغلبان مفيش منى فكاك
وهبقا فى حياتك نبض القلب من جواك
ولو افترقنا هلقاك جايلى واستناك
وتموت وهفضل سيرتك مش هتدفن وياك.
....