.. فوبيا النت..
بتعيش مرعوب من داء النت
بتبقا فريست المتلازمة
تتجمد خوف
متهيألك ان التانى
عمال بيجهزلك فخ
....
وتكون العفوية ف لحظة
تدى الخنجر
للى المفروض يحميك
لجل مايخترع الهفوة
يعملها فضيحة وسكه مشاع
وأهو شئ يتباع
فى السوق الداير وتجارته
أكاذيب البياع وشطارته
....
تحوير الكلمة وتدويرها
والنفخ فى كير المعنى
الكامن تحت رماد
وماهوش مقصود.
لكن وشه الأكحل موجود
....
فيقلب كل وشوش اللفظ
بيوصل لخليط صبغة
يخلى الألوان تتحول
من أبيض لرمادى لأسود
...
ويحط اليرقات مصفوفة
تفقس فى الجو اللى مولع
شايلة الفيروس فرشة و دهانات
تتسرسب جوا قلوب الناس
وتلون بسوادها الاحساس
....
يتعفن قلب التفاحة الناضجة
وحبيب يطعن صدق حبيبه
يتفرق كل صاحب مخلص
عن سكة أخوه
يسقط عودهم من نخر السوس
والفكرة النت اللى مخلى
أزهار الحلم كابوس