كل شي بعدو ناطر

كله اتجمد محله

حتى دمع العين !

خلص معش قادر

يبعت لحبيبه مكتوب

و ما يوصلله !

بكل زاوية من هالبيت

بشوفك

بكتبك

بعطرك

بصورتك !

و بتذكر لما سألتني عن وعودي

قلتلك وحياتك بوفّيها

هات كل خبريّاتك عندي

بين ضلوعي بخبيها !

يومتا قطفتلي وردة

قلتلي خدي ... اعتني فيها !

و صرت كل ليلة ازرعا عالمخدة

شوفني و شوفك فيها !

بتذكر لما التقينا آخر مرة

قعدنا هون ... جنب هالدفاية

بتذكر بهيديك السهرة

حكيتللي حكاية ...

ليلتا بكيت ...

مش دايما بتكون سعيدة النهاية !

و أنا هلأ بس وعيت

ليش جمرات الدفاية بردت

ليش النار فيا خمدت !

أنت يمكن بلشت هالرواية

بس للأسف بعدا ما خلصت

بتشهد عليّي ذكرياتي اللي ما انطفت

يللي بعدا من دمعاتي ما اكتفت !

أنا ما فيني قول إني هلا بكرهك

لأني ما تعودت أهرب من الحقيقة

و برغم قسوتك رح ارجع اسمعك

و ما رح اتردد دقيقة

اني ضل حبك ... يللي انت حبيبي

و انا بالنسبة الك

مجرد رفيقة !