تويت
أنا.. والبنطلون .. وعم حمدي
1
قال لصبيِّه : اكتب ياابني : الطول 92، فتحة القدمين 24 ، الوسط90 .
تذكرتُ أيام الشباب حين كان وسطي يملأ 104سم .. الله يرحم .
قال عم حمدي : تحب الفتحة سوستة وللا زراير ؟
ـ على بركة الله .. فوت علينا يوم الخميس تقيس البروفة .
2
ـ إيه دا ياعم حمدي ؟ البنطلون واسع جدا
ـ إزاي ؟ ماهو دا مقاسك يا أستاذ
ـ مش ممكن .. حتى شوف ..
ـ نراجع المقاسات تاني ..هات المازورة ياابني .. اكتب ورايه :الطول 90 ، فتحة القدمين 24 ، الوسط76 .
ـ لأ يامعلم .. دا كان 90 .
ـ سبحان الله .. طيب يا أستاذ سيبه وفوت علينا الخميس الجاي .
بعد أن مشيت عدة خطوات نادى عليَّ عم حمدي : يا أستاذ .. يا أستاذ
ـ خير ؟
ـ الحاجة دي بتاعة حضرتك ؟
كنتُ نسيت شنطة فيا الدجاجة التي اشتريتها بثمانية وثلاثين جنيها وأنا أترحم على أيام أن كانت بستة جنيهات .. بالأمس القريب .
3
ـ خلصت البنطلون ياعم حمدي ؟
ـ أيوه يا أستاذ .. إحنا آسفين جدا .. بس المرة دي مظبوط جدا جدا .. اتفضل قيس .. هنا ورا الباب .. شد الستارة ياعلي .
ـ إيه دا ياعم حمدي ؟ دا أوسع من الأول ..
ـ مش ممكن .. راجع معايه ياابني .. هات المازورة .. تعال يا أستاذ .. اكتب ياعلي : الطول 88 ، " قلت في نفسي : ما علينا من الطول "
فتحة القدمين 24 ، الوسط 69 .
ـ لأ يامعلم ، دا كان 76 .
ـ عجيبة .. إيه اللي بيحصل ؟ طيب معلهش المرة دي كمان .. فوت علينا يوم الـ ..
ـ لأ بلاش الخميس .
ـ نخليها الجمعة .
مشيت بضع خطوات ثم نادى عليَّ عم حمدي : يا أستاذ : الحاجة دي تبعك ؟
ـ أيوه .. شكرا .
كنتُ نسيت لفة ورق بها كيلو جبن أبيض اشتريته بثمانية وعشرين جنيها وأنا أترحم على أيام أن كان كيلو الجبن بثلاثة جنيهات وربع .. فقط بالأمس القريب .
4
ـ سلامه عليكم ياعم حمدي .
ـ وعليكم السلام .. اتفضل .. ادخل قيس .. قيس بسرعة .. بسرعة وحياة ابوك .
ـ إيه دا ياعم حمدي ؟ دا أكيد موش بنطلوني .
ـ لأ والله هوه .. أنا حفظته صم .
ـ دا بيقع لوحده ياعم حمدي .
ـ هات المازورة ياابني .. راجع معايه .. الطول 92 ، فتحة القدمين 24 ، الوسط 55 .
ـ لأ يامعلم .. دا كان 69 .
صرخ عم حمدي : ياعالم .. ياهوه .. إلحقوني ,,
قلت له : لا تحمل هما ياعم حمدي .. سأمر عليك في وقت آخر تكون أعصابك أكثر هدوءا
وأنا أنوي أن لا أعود .. وعليه العوض ..
بعد عدة خطوات مشيتها نادى عليَّ صبيُّه "علي " : يابيه حضرتك نسيت دي ؛ فأخذتها وشكرته. كانت بطيخة اشتريتها بسبعة جنيهات وأنا أترحم على الأمس القريب أيام أن كانت بربع جنيه أو ثلاثين قرشا على الأكثر .
5
سأل عم حمدي عن بيتي بعد غيابي الطويل عنه ، ثم اصطحبني إلى المحل لأقيس آخر بروفة.
ـ اتفضل قيس المرة دي .. وما تقولليش كاني ولا ماني .
ـ إيه دا ياعم حمدي .. دا أكيد موش بنطلوني .
ـ ورحمة أمي وأبويا وكل الميتين هوه .
ـ إزاي دا بيقع لوحده .
ـ هات المازورة ياعلي .. راجع معايه .. افرد نفسك يا أستاذ محمد .. اكتب ياابني : الطول هوه هوه .. فتحة القدمين هيه هيه .. الوسط 2سم .
صرختُ غاضبا : ياعم حمدي دا كان 55 قبل كده .
ـ ياابني آدي وسطك وآدي المازورة ، الأرقام ما تكدبش .. وللا نروح نقيس في الشهر العقاري ؟
ـ بس من 55 سم لـ 2سم مرة واحدة .. موش حاجة غريبة ؟
ـ ما انت بقالك كتير ما حدش شافك .
ـ معاك حق . كنت مشغول ..
ـ ودا موش ذنبنا .
ـ طب والحل ؟
ـ اقعد نشرب الشاي وبعدين يحلها ربنا .
شربنا الشاي وقام عم حمدي وأوقفني أمامه وجاء بالمازورة ,,
اكتب ياعلي : الطول ما علينا .. فتحة القدمين : ما علينا .. الوسط 3 مم .
ـ بتقول كام ؟
ـ 3مم
ـ خدهم .. موش عاوزهم .