تويت
فوق القضيب مجروح
تحت العجل مدبوح
و المزلقان واقف
**
**
جدعان وولاد حلال
بيلملموا حتته
و غفير جاي من بعيد
جايب معاه جرانين
تشكر يا عم سعيد
**
كان عاوز يروح مصيف
كان عاوز يروح مصيف
كان ماشي يحسبها
وف لحظة طن الحديد
نط له ف حلمه
و ف ثانيه غول الحديد
هد له المصيف
**
هد له المصيف
**
الواد ياعيني راح
الواد مبقاش موجود
و الحلم نام و إرتاح
الحلم صار مفقود
لا بحر و لا شمسيه
و لا حتى لقمه طريه
و مراته واقفه تنوح
**
من قلب الناس و الزحمه
**
من قلب الناس و الزحمه
الحزن بيتولد صرخه
وخدينك و رايحيين فين؟
و كإن مراته مش عارفه
الميت على فين بيروح
**
فوق التراب مجروح
تحت التراب مدبوح
و المزلقان واقف