تويت
انا في الخيال قادر عليك؟
لامن تجيني بلامواعيد
وانا براي
غير خوفي منك وشوقي ليك
والدنيا ليل
وانا لسّه اعلّم في لساني يقول
حروف كلمة (م ن ا ل)
وانفاسي تتسابق عشان
تاخد شرف كلمة منال
وانا من عرفتك
غبت عن دنيا التلاعب والظنون
وغرقت في بحر التوحد والسكون
وانا شفت في عينيك كمان
الدنيا كيف اتغيرت
وعرفت إنو الطيبه من الدنيا
بي وجودك ما انتهت
وغالبني اشوفك في الخيال
والليله جيتك اسألك
عارفه القمر ساعه يغيب بتمشي وين؟
منو العارف القمر ساعة يغيب
بتمشّى وين؟
اتخـــــــــــــيلي
اتخيلي القمره التضوي الليل
ساعة تغيب
تنزل تفتّش في الارض
تاخد ملامحا من عيون انسان
بريدك ومشتهيك
وانا يا منال اكان علي
القمره ما تغش الخلايق
بالسماح المن عيونك شالتو
القمره دي تقعد متل كل الخلائق
وحين ظهورك تختفي
* * *
يا بت مسوّيه من
خلاصة الطيبه في كل البشر
ما لياهو قلبك بالسماح
رغم المصائب والجراح
حاشاها نفسك
من مكايده ولا شر
يابت كفاك همّ النهار
والقومه قبال الفجر
علمتي ناس الحله كيف
الزول يشيل حمل الصبر
يابت تساهر الليل
توزع للبـــــيوت
حق العشا وشاي الصباح
رغم المصائب والجراح
واكبر مصابك
من دمـــوع الناس
واكبر يا منــــــــــــــال
ياطيبه من قدح الصبر
ماكي البتدخلي في البيوت
بتكوسي لي صحة خبر
او حايمه تنشري في خبر
ماكي التوسوسي بالكلام
ماكي البتقطعي في البشر
غير الســـهر
في الدعوه
للحيين وللدخلو القبر
* * *
وانا يا منال
كلمّت بيك كل البعرفو الحب
على وجه الارض
وريتم إنك يوم تبيني
الطيبه تنزل
في قلوب الدنيا
زي نقط المطر
عرفوك قبل ما أشبهك
حبوك قبل ما اوصّفك
وانا يامنــــــــال
يكفيني لو قلمك
يخطني في سطر
وليك السلام
الريده والشوق والحنان
والاحـــترام
وادّيني منك
نقطه من بحر الصبر
يابت مسوّيه من
خلاصة الطيبه في كل البشر