يوميات زوجية من حياة .."شوشو وبندق" !!

**رشا عبادة** · 23-12-2009, 06:32

الأهم

بدأ قائد الدي جي

بدعوة أصدقاء العريس والعروسة

للرقص

وهو يستعمل اسلوب "الحضانة " كى جي ون ، كى جي تو" ليحث الجماهير"المصدعه" على التصفيق

"قائلاً لهم..

_اللى بيحب شوشو عروستنا

يصقف ويرفع ايده لفوق

ويهتف

"بص شوف ، شوشو بتعمل ايه"

وهنا طبعا قامت عائلتة شوشو مشكورة ، بالتصفيق"من غير نفس"

وهم يهتفون" بص شوف، خيبة شوشو يا بيه"!

ثم تبعها بجملة بلهاء مشابهة قائلاً..

_اللي بيحب بندق

يصقف ويرفع ايده لفوق ويقول

"بص شوف ، بندق هيعمل ايه"

وبهذة اللحظة"تحديدا" إكتشفت شوشو

ان الفرح ده على ما يبدو مش"فرحها" بتاعها،وأنها دخلت فرح غلط اكيد فقد كانت كل المعازيم تهتف وتهلل لبندق

قائلة

"بص شوف بندق هيعمل ايه، هذا غير الزغاريد التى دامت نصف ساعة وبندق يرقص ويتنطط

وكأنه فى حملة إنتخابية ومرشح للزواج من سيدة القصر الأولى!!

حتى انه قام بتحريف الهتفات، وطلب من الجماهير ان يرددوا خلفه مقولة

"ارقص يا ليمون، بندق هيجيب جون"!

"ارقص يا ليمون بندق هيجيب جون"!!

_ اى جون هذا المجنون، الله يسامحه المأذون

الغريب ان المأذون قبل عقد القران ، اخذ يلقي خطبة عن ان من اهم شروط الزواج هو ان يكون للعاقل،البالغ ،الرشيد!!

المشهد ما قبل الأخير!

خطوات الهبوط، الإضطراري من على الكوشة

تصاحبها..موسيقى جنائزية

مناسبة

والعروسيين"شوشو وبندق" فى طريقهما

لسيارة الزفاف" المزركشة" بكم من الورود ،يكفى لإحياء ثلاث ،جنازات

الفصل الثالث والأخير من الحلقة الأولى

المشهد الأول

طريق العودة

طابور "ذنب" من السيارات والموتسيكلات

"وبيب بيب، بندق

بيبي بيب ، شوشو"

والكل يشترك،

فبعض السيارات التى كانت تسير على الطريق والتى لم يكن لها اى علاقة بالفرح

أخذوا"يطلقون صافرات وزمامير وابواق سياراتهم" من باب الشماته كونهم"السابقون ونحن اللاحقون

فيجاملون العروسيين على سبيل

ان"الزمارة البيضا تنفع فى اليوم الأسود

او كما أحب ان اقولها "افرحلي بجوازي، ابكيلك بطلاقك"

او من باب "العزوبية التى يظن من يعيش فيها ، ان المجانين فى نعيم، يوه اقصد المتزوجون فى نعيم"!!

المشهد الثاني

أخيرا وصلا العروسيين

بندق وشوشو لعش الغراب

شوشو"حبيبي مش هتشيلني زى ما تامر حسني شال مى عز الدين فى الفيلم ، ده انا بقالي اسبوع مش باكل ولا بشرب عشان اللحزة"اللحظة" دي

_بندق... حبيبتي، انا مقدر مشاعرك طبعا، بس انتى كمان لازم تقدري مشاعر "ضهري" وإحساس"فقراته" انا بقالي اسبوع

مش بشيل اى شىء "عشان اللحزة "اللحظة" اللى جاية "بإذنك يارب"

شوشو" يعنى ايه يا بندقي ، انت بتمتنع عن حملي حملاً، إستثنائياً، زوجيا بأول "لحزة" تجمعنا فى خندق واحد!؟

بندق_ ايوة حبيبيتي كده احسن ما احملك حملاً جوه الحندق حالياً

وبعد ربع ساعة، نعمل معاهدة سلام نتيجة لأن القائد الأعلى للقوات البندقية ، يعاني من خلل ويرقد فى فراش المرض الزوجي للأبد، ونخسر الحرب يا حبيبتي ويبقى لاأنا قدرت أحملك

ولا انتى ينفعي تحملي اى شىء!!

الأهم

استسلمت شوشو للأمر

من زاوية

"جت شوشو تفرح ،ملقتش فى بندق مطرح"

المشهد الأخير

ايه مالكم

مفيش مشهد طبعا
!!!

فى هذا المشهد تحديدا، تم تسريح جميع المواطنيين خارج صالة العرض

لأن الممثليين، أخدوا إجازة

بعد أداء ركعتيين" شكر لنجاة كل منهما من طبيخ العزوبية ،و وصمة العنوسة"

وشرب كوب كبير من الحليب المبستر

واللهم ارزقنا خيركم وخير ما خلقتم له

واكفنا شركم وشر ما خلقتم له

وتقعدوا بالعافية

وانتظرونا غدا بالصباحية المباركة إن شاء الله

مع تحيات العروسيين

وأسعد زوجيين

"شوشو وبندق"

**مصطفى الصالح** · 23-12-2009, 06:54

مين كتبلك كل الكلام ده؟

ما شاء الله لا حسد تو تو تو

بموضة"بخ عو

منين جيبتيها الموضة هاي؟

تحياتي

ويعطيكي الف عافية

ويخلي ايامك فرح وسرور و..

**دكتور مشاوير** · 23-12-2009, 15:49

[align=center]
يعني فيه مسلسل من غير مشهد أخير ...ولا العروسة للعريس والجري للمتاعيس ...؟ما احلى هذا الفرح،وما احلي العروسين.
تب بندق ده خالد الغندور، الزمالك وعرفناه
طيب شوشو دي تطلع مين ؟؟؟ شعبان عبد الرحيم ..؟هعههههعهع
عموما في انتظار باقي حلقات المسلسل من يوميات شوشو وبندق.
ويحكي بندق ..في مشهد محذوف من مشاهد الحلقة الأولى...
وهو يتوسط النساء في الرقص فهو كمعظم الرجال بعد أن اكتشف التدبيسه "عينه زايغه "، باتجاه منصة العروس "وهو يخرج لسانه "لشوشو "،فتتزاحم النساء من حوله لجماله وطوله الفارع وكل واحدة تبحث لها على فوز برقصه معه "وشوشو "تبحث عن بلطه من حاولها " لقصف رقبته ". وعندما أصبح " بندق "ومن ترقص معه على بعد خطوات منها رفعت"شوشو"طرف المفرش الذي يغطي الطاولة القريبه منها "لكتم انفاسة " وهي تموت قهراً، وعندما لم تفلح خلعت عنها ديل الفستان فظلت على حالها بسروال طويل وكأنها من ابطال فيلم "الأرض "وراحت تتفحص أوجه النساء واحده تلوالأخرى غيرعابئة بهمهمات النساء،المعجبات بعريس الهنا،بعد أن اكتشف حقيقة "العروس شوشو "والتى لم يكشف المستور عن وجهها إلا بعد أن زال عنها مكياج موضة " بخ عو "أثناء الرقص.....!!
فا يترىَ ستكتمل الليلة،ويستمر " بندق "في ليلة الدخلة ..؟!!

رغم حجب المشهد الأخير من الحلقة الأولى..؟
متابع استاذة رشا عبادة بااقي الحلقات

[/align]

**دكتور مشاوير** · 24-12-2009, 05:40

[align=center]
في انتظار الحلقة الثانية من يوميات العروسين "شوشو وبندق "
ولا يمكن،تم تغير البث الأرسالي،على عروسااااات
إين أنتِ يا بنت العبايده...!
[/align]

**رشا عبادة** · 01-01-2010, 15:09

عدنا والعود" أخضر" بإذن الله
نستكمل معكم الحلقى الثانية
من يوميات زوجية لـــ "شوشو وبندق"

بعنوان
" الله حى ، "حَبلظ" فى الطريق جى"

بعد مرور ثلاثة أسابيع تقريباً ، على الزواج
وبعد إنتهاء مدة صلاحية "برطمان" شهر العسل والكسل
"والضحك على الدقون"
بدأت شوشو فى توديع ، أيام الدلع والطبطبة
بعد\ ان كشف بندق عن وجه"الغوريلا، الذكري"
وبعد ان نفض كل من " أم العريس وأم العروس" ايديهما من، معونة الغداء والعشاء التى كانت تصل على التوالي والتوازي لبيت العروسيين

واليكم مقطفات من الأحداث المأساوية" بمطبخ، الزوجية"
(المشهد الأول)

شوشو تقف، بمنتصف المطبخ
"طبعا بكامل عدتها ترتدي "قميص معفن بالي قديم، وتضع على رأسها تعصيبة بالمصري، ايشارب صغير، وعلامات البؤس والحيرة تبدو على وجهها و هى، تهرش برأسها وهى تسأل نفسها...

" يا ترى اطبخ ايه، لبندق،؟؟ ده"متوحش" لو ملقاش أكل ممكن ياكلني"
وبعد "تفكير غميق"
قررت شوشو ، ان تضحي وتتعب نفسها وتطبخ " مكرونة، باللحمة المفرومة"
أحضرت " عدة الشغل"
أخرجت كيس المكرونة " الروجينا" أحسن نوع ، آه اسمه روجينا ، ده بينه نوع أجنبي او صيني، ياااه اد ايه بندقي حبيبي مدلعني، وجايب لي مكرونة من النوع الغالي، ولو انه كله عشان بطنه!!"
ثم تابعت الهرش.. وهى تتسائل..
_ يا ترى ، ايه هيا درجة حرارة المياة اللازمة لسلق المكرونة، بدون ما تفقد المكروناية "قيمتها الغذائية"!

انا لازم اتصل بماما، اتأكد، مش لازم اضحي بصحة بندقي حبيبي" على الأقل لغاية ما أخلف منه، "حبلظ ورنجاية" ولادي حبايبي ، مش ممكن اضحي بصحتهم ممكن يطلع فى "قفاهم" عود مكرونه" لو المقادير مش صحية ويورثوا " جينات المكرونة المتنحية" من ابوهم "بندق أبو البنادق"!

( المشهد الثاني...)
شوشو ... تتدحرج فى صالة البيت مسرعة، لتجيب"جرس" الباب
_ ايوة مين، بيخبط؟؟!!
" ايوة يا عروستنا ، انا جارتكم"أم كوتو موتو"، افتحي يا عروسة الدار، أمان"
تفتح شوشو الباب بحذر.. فتدفعه" ام كوتو موتو" وتدخل عافية!

وهى ترقع زغرووودة
لللللللوللللللو للللللليش
يا الف نهار ابيض، يا الف نهار مبروك
"جيت ابارك واهني، للعرايس، بقالي اسبوعين منتظراكم ترجعوا من "شهر العثل"
عشان ارسيكي واوعيكي، آه ما هو انتى زى أختي "الثغيرة"
وأكملت "ام كوتوموتو" ، حديثها دون ان تعطي فرصة ، لشوشو بالرد أو حتى التنفس قائلة وهى تتجول فى الشقة، ( من غير احم ولا دستور)!

" شقتك حلوة اوى يا عروستنا، بس ذووقك فى اوضة النوم بلدي شوية، ههههه ولو ان البلدي يوكل، ومفيش احلى من البلدي" ههههه" ضحكة مطرقعة تشبه ضحكة البرص المجنون!!"

شوشو__ طيب اتفضلي ، يا ام كوتو ارتاحي بالصالون، تحبي تشربي ايه " ساقع ولا سخن"!؟
ام كوتو" ثاقع ايه يختى وثخن ايه، انا مش عيزاكي تتعبي نفثك فى حاجة "خالث"
الحركة الكتير غلط عليكي!

شوشو_ حركة ايه اللى غلط يا، ام كوتو... انا مش فاهمة حاجة!؟
ام كوتو " يا حبيبتي ، مش ايز يكون فى حاجة كده ولا كده، والأمر ميسلمش
والبيضة لما يكون فيها كتكوت ، لازم الفرخة الشاطرة ترقد عليها!!

تعالى تعالى ارتاحي، وقوليلي حاثة بايه، ده انا مخلفة عقبال عندك عشر عيال صبيان وبنات، يعنى اقدر اقولك من اول اسبوع حمل، اللى فى بطنك قرد، ولا عصفورة!؟

شوشو__ قرد ايه وعصفورة ايه، ده احنا لسه مكملناش 3 اسابيع يا ام كوتو؟

ام كوتو " ايوة يا حبيبيتي ماهو لازم تحافظي من دلوقتي من اول يوم، افرضي فى حاجة، يبقى الشيىء لزوم الشىء.
انتى تقعدى هانم وتخلي جوزك المحروس "بندق" فندي يخدمك ، آه اسمعي كلامي ، جوزك على ما تعوديه وتخنقيه و، وابنك على ما تربيه وتذلييه!
والست الشاطرة لازم تدبح "الكلب الأسود" لجوزها، من اول يوم
اسمعي كلامي

الرجالة ملهمش امان، ولا ليهم لازمة اصلا يا حبيبيتي
بس اهو احنا بننشلهم من الضياع على القهاوي، والنواصي والماسنجرات، والدِش
وآهى حسنات بنجمعها عشان ندخل بيها الجنة " إن شاء الله"

( المشهد الثالث)
شوشو تجلس على الأريكة وعلامات" الإسبهلال" تبدو على وجهها وهى لاتزال تستمع لنصائح ام كوتو وتهز رأسها مرددة
_ عندك حق
صح تمام
عندك حق
صح تمام
ام كوتو تكمل"نصائحها اللى تودي فى داهية" قائلة..
اسمعي ممنوع تعملي اى حاجة من النهاردة، لما يرجع جوزك تقوليله احنا اخوات، لمدة شهر، ايوة يا حبيبيتي عشان لو فى حاجة ولا محتاجة، الكتكوت ميطرش من البيضة، قبل ما تفقس.
واهو لو جوزك " اسم النبي حارثة وصاينه" طالبه معاه اوى يعني ، ابقي ناديني وانا اعقله وافهمه، آه ماهو زى ابني، وشباب اليومين دول يا بنتى جهلة خالث، الله يرحمه ابو كوتو وموتو، كان مدرسة.. لا مدرسة ايه كان جامعة وحياتك " ههههه " ضحكة ام كوتو المطرقعة!!

بعد ان اتمت ام كوتو "بخ السم" فى أذن "شوشو"، استأذنت بالإنصراف، على وعد بالعودة ليللا لنكمل حفلة السمر مع بقية الشمطاوات ، قصدي الجارات بالعمارة
بعد تسريح ازواجهن على القهوة، "برضاهم او غصب عنهم"

(المشهد الرابع..)
بندق ، يفتح باب الشقة، ويدخل مسرعاً وهو يجري نحو "شوشو"
_ حبيبتي ، وحشتيني، انا جعان اوى يلا عشان تأكليني
ايه طبخالي يا نور عيني!؟

شوشو_- ايه يا بندق بتقول ايه، طبخالك!!؟؟ وهنت عليك تقولها، طيب لو انا هنت عليك هان عليك حبلظ ابننا وهوة لسه كتكوت جوة البيضة اللى لسه هتفقس!
بندق متعجبا ، مسترباً
" بيضة ايه يا شوشو، ايه حبيبيت انتى طبخلنا بيض وكتاكيت، قصدك حمام ياروحي ياه على رقة مشاعرك ، بتسمي الحمام كتاكيت، ليلتنا عسل يا جميلن تعرفي انا جاى وبحلم بجوز حمام محمريين وبالسمن البلدي
" ااالله ااالله يا وعدي، الحقيني بالأكل على ما اغير هدومي يا زغلولتي"

شوشو تمسك ظهرها وتتألم قائلة..
_ آه أى يا ربي، بس يا حبلظ كفاية، انت اجننت يا بندق بقولك حبلظ ابننا تقولي حمام وكتاكيت
انا يا حبيبي كنت هضحي واطبخلك مكرونة ، لكن مقدرتش خالص يا بندقتي
انت مش شايف وشي أصفر ازاى، ونفسي غمة عليا أوى،
ومش طايقة ريحتك،ولا طايقة شكلك
ولا قادرة اتحمل صوتك

ارجوك.. يا بندق شهور الوحم الأولى فظيعة مريعة ، مرهقة، وانت عارف انا بنت عز واكل وز، "والدادا الفلبينية" كانت بتعملي كل شيء حتى هيا الى كانت بتغسل وشي الصبح عشان " ايدي متتبلش"

_ يلا حبيبي اتصل بــ مطعم التيك أواى اللى اتقابلنا فيه اول مرة، وهاتلنا 2 بيتزا بالحمة المفرومة والسجق والبطارخ والإستاكوزا، وقوله يخلي باله من درجة حرارة الفرن وهوة بيسوي البيتزا
عشان تبقى بيتزا صحية، ولا انت عايز "حبلظ" ابننا" يطلع فى خده "بيتزاية، والبنات يطمعوا فيه، وكل شويه يطلبوا منه بوسه، آل يعني بيدقوا البيتزا!

تابعونا فى الحلقة القادمة
من يوميات " بندق وشوشو"
أسعد زوجيين

**غاده بنت تركي** · 02-01-2010, 08:48

ههه
يا عسل رووووووعة
بس تفتكري بندق هيعمل فيها أيه ؟
متهيأ لي بيحولها ألى عيش مبطط

قررت شوشو ، ان تضحي وتتعب نفسها وتطبخ " مكرونة، باللحمة المفرومة"

هه
تذكرت واحد صاحبنا بيعز المكرونة أوي

انا تبيعي ( طبيعي بس رقة هع )
أكره الزواج والحين بعد الكورس المكثف ده
يمامي ريحته وحشه الجواز ده اهيء
【ツ】【ツ】

يا بت يا رشا أيه الحلاوة دي أيه الطعامة دي
هتنونو يعني هتنونو
هع

ننتظر كملي المسلسل بعدين يطلع في
الانتظار بتاعي وحمة زعل يا دلي

**اسماعيل الناطور** · 02-01-2010, 10:24

يا رشا
أقولك سر
وأرجو أن يقلدني ......من يقتنع
عندما أبدأ في تصفح الملتقى
أجعل مشاركاتك آخر ما أقرأه
تكونت لدي ثقة
إنه مهما قرأت وضغط الآخرون على أعصابي
سأجد عندك ما يعيد البسمة والتوازن
فشكرا

**دكتور مشاوير** · 03-01-2010, 07:36

[align=center]

دووووقوا الطبول ....
حبلظ جااااااى..
وسوف يبدأ الدلع ويعيني على الجدع ..
وعلى لامة الجيران من اشكال الساحرة الشريرة هتكتر ويزيد الكلام.
وقبل ما يتولد حبلظ الغلبان ..هيقع الطلاق ويتشرد وعلى الرصيف ينااام وكله بسبب دماغ شوشو وسماعها لكلام الجيران ..
والنبي يرضيكم يعني هو شوية المعكرونة إاللي كانت هتعملوهم هيتعبوها ..
وجع ....
متاااابع لبقية الحلقات ..
[/align]

**عمر موسى** · 04-01-2010, 08:51

يا سلااام عليكي يا ست رشااااا

قرأت لك عدة مواضيع قبل أن أصل هنا ..

لديك نفس في الكتابة ، تحسدين عليه ..

ما يميز قلمك ، خفة الظل ، وعنصر التشويق ..

وهذا ما جعلني أستمتع بالقراءة حتى النهاية ..

مودة خالصة .

**رشا عبادة** · 06-01-2010, 04:15

عدنا والعود " أخضر" إن شاء الله
الحلقة الثالثة.. من يوميات " شوشو وبندق" تحت عنوان
( شوشو و "الواو" وبندق و"الواوا")!!

المشهد الأول
" عش الغراب" قصدي
عش الزوجية
بندق ، يقف بالمطبخ، يرتدي "مريلة المطبخ"، باكياً وهو يقوم بتقطيع "فحل" بصل كبير، وهو يتمتم بأغنية الموسيقار فريد الأطرش

" ياما جوه القفص مظاليم، بيقاسوا وحيلتهم جيم، يا ما جوه القفص مظاليم ....."
فجأة يأتيه صوت شوشو ، عابر القارات من غرفة النوم حتى المطبخ صارخة..

__ بندق، انت يا راجل،
انت يا أخرة صبري
الحقني بسرعة أوام يا بندق، بيني هولد، آه ياني

_ يسرع اليها بندق ، محاولا تهدئتها وإسكاتها قائلاً..
" يا حبيبيتي تولدي ايه بس، بقالك 3 شهور كل شهر تقوليلي انا حامل، ويطلع اللى فى بطنك" شوية برد، او مغص، او كذبة إبريل!"

__ شوشو
( ايه، قصدك ايه يا بندق، قصدك ان ه العيب مني
وانى ارض بور لاتطرح ولا تثمر ولا تسمن من جوع، يا خسارة حبي ليك وسهر الليالي بعد النجوم واناجيك، _يا أستاذ لازم تعرف ان الأم بتعرف ابنها وتحس بيه لو كان وسط مليون طفل!، وانا حاسة المرة دى انه الواد اللي فى بطني ده" حبلظ" ابننا... إن شاء الله)

بندق..
" ايوه حبيبيتي ، بس انا تعبت من تقطيع البصل، جالى حول، وزمايلي بالشغل، بيتريقوا عليا وبيقولوا انى هرموناتي الذكورية ، اتغيرت وأتأثرت بعد الجواز
دول حتى مسميني فى المكتب " أستاذ حمام نحن الزغاليل"!!"

شوشو_
يعني يا بندق انا اشيل حمل زيادة، لمدة 9 شهور، وانت مش قادر تغسل الأطباق وتنضف الشقة ، لمدة سنة بس، بعدها" حبلظ" بإذنك يارب، يكبر، نوديه عند جدته، ونتفرغ للتفكير ازاى نخاويه ونجيب البت" رنجاية"
وبعد 10 سنين هيدخلوا الإعدادية وهنرتاح ونستقر من مشاكلهم،واوعدك وقتها، هشيل انا عنك حمل الطبيخ والغسيل كله يا حبيبي.

يتمتم بندق "بسره"
_ده اذا كنت هفضل عايش، كمان سنة يا مفترية!!

شوشو... وهى تشير لإذنيها..
" بتقول حاجة يا حياتي ، سامعة كلمة، مفترية!؟"

بندق...
"لا يا روحي ده انا بسألك، تحبي أطبخلك فراخ، ولا أرانب على الملوخية!؟

شوشو ...
لا لا، انا مش قادرة آكل حاجة
آه هاتلي دكتور حالا
دكتور يلحقني
المغص جوه فى بطني"

المشهد الثاني
يخرج الطبيب من الغرفة بعد إتمام الكشف على شوشو ، مبشرا بندق ابو البنادق
ان"مبروك المدام حامل"
فيسأله بندق مستغرباً
" حامل ايه بالظبط يا دكتور!.
الدكتور
-ايه يا استاذ ، هيا الفرحة طيرت عقلك ولا ايه
بقولك المدام حامل...
بندق.. بعصبية
" ايوه سمعت ، وانا بقول لحضرتك حامل ايه بالظبط
ماهى الحوامل كتير
حامل فيرس،
ولا حامل معدني
ولا حامل معالق
ولا حامل عدوى

_يا دكتور اعذرني بقالها 3 شهور ، بتقولي كل يوم انها حامل وهتولد!
" ده انا بقيت بخاف لما بسمع صوت عيل صغير بالتلفزيون، بقوم من النوم مفزوغ ، مفكر ان شوشو ولدت خلاص، وان " حبلظ" ابننا شرف!!

الدكتور ، مربتا على كتفي بندق
_ ياه يا استاذ بندق ده انت حالتك صعبة، على كل حال كلها كام شهر والمدام تقوم بالسلامة، تمن الكشف لو سمحت!؟

بندق...
" كشف ايه يا دكتور ، ربنا ما يكشف لك ستر
وهوة مين اللى كشف الغطا عنك، يا دكتور!؟

الدكتور مشوحا بيديه ومتجها نحو باب الشقة بعد ان اقسم انه متنازل عن ثمن الكشف قائلاً..
" يار يتني كنت سمعت كلام امى ودخلت قسم طب أطفال، على الأقل كنت اترحمت من المجانيين اللى بيجوزوا ويطلعوا عقدهم من ستاتهم علينا إحنا"

المشهد الثالث
" بعد 4 شهور" من حمل شوشو ورقدتها على البيض طوال الوقت وهى تقنع بندق "الغلبان"
بأن ولادة الإبداع تحتاج، لراحة وإستقرار، وسكينة، ورقود على البيضة!!

تقف شوشو امام المرآة
تتأمل هذا الإنتفاخ الطارىء، المنتشر المتوغل فى كامل انحاء جسدها، موجهة حديثها لبندق...
" حبيبي هوه انا فعلا " كل حاجة فيا أصبحت كبيرة!؟
فيجيبها بندق وهو يشد الغطاء محاولا النوم بعد عناء يوم طويل بشغل البيت " كالعادة"
_ لا يا حبيبيتي ، دة انتي عصفورة!
شوشو...
" عصفورة ايه ، دة انا بقيت شبه "علاء ولى الدين فى دور أم الناظر صلاح الدين"
مش معقولة يا بندق، انا حياتي بتدمر\ بقيت شبه حرف "الواو" صح !؟

_
، ايوة صح
شوشو وهى تشد فى شعره وترفع عنه الغطاء

" ايه صح.. يعنى خلاص مبقتش بتحبني
ماله حرف الواو يا أستاذ، دة جهل ذكوري بأهمية تعليم الجنين وهو فى بطن امه
وبأهمية حرف الواو وتأثيره على شخصية الجنين

وأخذت شوشو تكمل درس" النحو الجنيني"، وبندق رأسه تتدلى على رقبته، على طريقة
"حرمت عيني النوم فين اروح منك
اشوف فيك يوم وانحرم يارب منك"

المشهد الأخير
شوشو تكمل الدرس.. بينما صوت "شخير بندق يأتي كعزف منفرد لديك مصاب بإنفلونزا خنازير!
_ حرف الواو يا استاذ
هو واو العطف.. دليل عطف الأم على "حبلظها" الصغير
وهو واو الجماعة.. دليل تجمع الأهل والأحباب بسبوع النونو"حبلوظتي"
وهو واو الدلع.. تبعا لقاعدة "بوس الواو" وباللبناني" بوس الواوا"
فجأة
تنتبه شوشو انه بندق" نايم وبيشخر" ، لم يسمع من درس النحو الخاص بها اى شىء وانه مستغرق بالنوم
فتلكزه فجأة صارخة
" انت نايم وانا حامل ، فين المشاركة بين الأم والأب؟!"

ينتفض، بندق فزعاً،وهو يصرخ
_ ايوه حبيبيتى انا صاحي
صاحى
سامع، معاكي حق
كله صح.
_تذاكت شوشو وسألته بمكر
"طيب انا كنت بقول ايه عن "الواو" لو كنت فعلا سمعتني ؟
_ يرد بندق بحالة نوم " مستعصية"
وهو يهز رأسه وبعين مغمضة
كنتي بتقولي
بوس " هيفا"
حبلظ "واوا"
شوشو " الجماعة
خوووخوووخاااااااااخ خاخااااااخ خوخووووو

"شخير بندقي " منفرد مصحوب بلحمية والتهاب بالجيوب الأنفية

تابعونا فى الحلقة القادمة" ان شاء الله"
لتحضروا معنا " لحظة ميلاد حبلظ الصغير "
وفرج يا فرج، يا معلي الدرج، يالى كسرت البيضة ، للكتوت خرج"
مع تحيات
شوشو وبندق
أسعد زوجيين"

**مصطفى الصالح** · 06-01-2010, 05:58

تحياتي

**رشا عبادة** · 12-01-2010, 00:19

[align=center] أستاذي الطيب الهادى الحكيم: إسماعيل الناطور
سعدت بالسر أيما سعادة يا طيب ، أسعدك الله
أتدري سيدي لم أكن اتوقع انكم ستستسيغون اللهجة المصرية العاميه،!!
صراحة فاجئني تفاعلكم الجميل سواء هنا او برحلة الأتوبيس
ماشاء الله عليكم

دكتورنا الجميل مشاوير " الف سلامة عليك تاني" إنشاله أوباما ولا انت يا خويا
معلشي سامحني بالتأخير والتقصير بكتابة الحلقات " انت عارف الظروف طبعا" بس إن شاله هتلاقي الحلقة الجاية بعد بكرة بإذن الله جارى التجهيز ، لاحرمني الله تشجيعك وطيبة تفاعلك الصادق

الباش مهندس الرايق واحلى تحيه على انغام بخ بخ عو هههه دى طريقة مكياج شهيرة يا استاذي، وهى تعتمد على إعطاء دروس نظريه لكيفية التفرقة بين ألوان قوس قزح على وجه إمرأة تشبه قوس السهام

الساخر الراقي أستاذ عمر موسى
منور يا طيب
والله " مش هخبي عليك" انا بعوض بطول التعليقات ، قصر القامة الوراثي
هههه أشكرك على تفضلك بالقراءة وعلى تشجيعك لحروفي
بإنتظارك لاتغيب علينا لاهنا ولا هناك
تحياتي لكل من مر وقرأ وابتسم أو فكر أو ،،،،
كونوا بخير

دودو الجميلة ، تواجدك يبهج قلبي يا قمر
متحرمش منك ابدا
فكرت ان اسمي البطلة دودو لتصبح دودو وبندق هههه بس خفت عليكي من الحسد والإشاعات

[/align]

**دكتور مشاوير** · 12-01-2010, 02:42

[align=center]

المشاركة الأصلية بواسطة رشا عبادة مشاهدة المشاركة

[align=center]دكتورنا الجميل مشاوير " الف سلامة عليك تاني" إنشاله أوباما ولا انت يا خويا
معلشي سامحني بالتأخير والتقصير بكتابة الحلقات " انت عارف الظروف طبعا" بس إن شاله هتلاقي الحلقة الجاية بعد بكرة بإذن الله جارى التجهيز ، لاحرمني الله تشجيعك وطيبة تفاعلك الصادق

[/align]

ربنا يوفقكِ في الأنتظار دائما..ولكن اخاف أن يحدث قبل الولادة .abortion
بالتوفيق

[/align]

**رشا عبادة** · 26-11-2010, 18:13

عدنا والعود ميمون بإذن الله
الحلقة الخامسة من يوميات شوشو وبندق
( الله حى حبلظ جى)
مهداة إلى أستاذنا الجميل "شفاه الله وعفاه" محمد فهمي يوسف

تقديراًً وإحتراما ًلـــ ــــ اللغة
العربية وبعد إنتهاء دورة شوشو التدربية فى حرف الواو التي طبقتها بحازفرها وحوافرها وأظافرها على بعلها السمين بندق
قرر المأسوف على شبابه
بندق أبو البنادق " توفيرا وإختزالاً لعدد الحضور من معازيم حفل "سبوع النونو
إجبار عائلة حبلظ الصغير لإقامة سبوع بإستخدام اللغة العربية الفصحى فى كافة تفاصيل الحفل" السبوع"

وتطبيق عقوبة " لسع اللسان بالشطة أووضع السيخ المحمي فى صرصور
ودنه"
- مع دفع غرامة إجبارية قدرها 95 قرش على كل حرف مخالف لتنظيم القاعدة التي ترتكز عليها موازيين اللغة.

-وغرامة 1ونصف جنيه على كل تشكيل خارج عن النص
وعلى كل إستعارة مكنية غير مبررة
-وعشرة جنيهات و75 قرش على كل زغرودة يتم رقعها دون محل للإيجار أو الإعراب

وعليه بدأت مراسم "السبوع" بحمل المولود المقلبظ حبلظ الصغير فوق غربال متوازي القطرين ومنبعج عند الحبل السري قبل وقوعه أى سقوطه
سقوطاً منتفخ الشلولحات، متكعكع العقد

ثم تلاه عزف منفرد من جدة المولود لزغاريد فصيحة على وزن "فعلله،فعلول" لولاللله لو لاله، لولول لووووو لول"

ثم قامت خالة شوشو بإشعال موقد الفحم"منقد"

الفخاري بعد أن ألقت عليه زيت زهرة "النونو بيعيط" لتنتشر رائحة الدخان فجأة متنقلة ما بين مسامات القصبات الهوائية للحضور، تصاحبها أعراض الإختناق المنبلج بالخنداقة"العائلية الشهيرة"
وشوشوتبرطم..

الدخان هيخنقني ميصحش، وانا لسه نفسه مربعنتش"
وعلى الفور أخرج لهابندق الكارت الأصفر وصفعها على أم "قفاها المسلطح" قائلاً..
ثكلتك أمكِ وأم التي أنجبت أمكِ يا أيتهاالأم أنا لكِ محذراً
فأسمعيني جيداً ، لانريد ضجيج أو زمجرة
حتى لا أضطر إلى إخراج الكارت الأحمر وطردك للخارج كما دجاجة وضعت بيضها فى الصبح فذبحوها وأكلوهاعلى العشاء محمرة ، فهلا تكفين عن القرقرة والشهقرة، وتقفزين سبع مرات فوق النار والموقد وانتي مكفهرة أو متحوصلة
حتى ننتهي سريعاً من هذة البدعة والمسخرة.

فصرخت شوشو وهى ترتعش خوفاً قائلة..
لبيكِ يا ذا القوام القصيريابعلي ويا زينة شباب بنت المعز القاهرة
أمرك مُطاع يا سيدي الأمير،إبتلاك إلهي بنومة على البرش وحولك شر الحرس
سر يا كايدهم فلا كبا بك الفرس.

ثم زعقت خالة بندق باالصوت الحياني لرعيل بأكمله وهى تدس ورقة من فئة العشرون جنيها بجيب بندق " غامزة بطرف عيون البقر مجلجلة..
الأولة
بسم الله
والثانية
بسم الله
والثالثة
رقيتك من كل عين حسود نغرس بها خِلة
والرابعة
محروس من شر النفوس المختلة
والخامسة
عقبال ما تجيب 11 ويبقوا فرقة وشلة
والسادسة
تعيش بصحة وتتهني انشاله
والسابعة
يا بركة الحبيب النبي محمد بن عبد الله
للللوولووولي لووووليش

وفى حين كانت شوشو أم حبلظ
قد إنتهت من القفز الجمبازي فوق الموقد المشتعل متعمدة رفع ذيل الفستان والتهوية به على الدخان كمن يشوي ذرة أو باذنجان
ثم عادت لتلكز بعلولها " بندق" هامسة بأذنيه الطويلتان..

"إنت يا مختل لموازيين، لماذا لم تطبق قانون فصحاك
أبو قربة مشروخة على خالتك" ليكون جايبه معاها كارت واسطة".

فأجابها متشلضم رافعا حاجبه الشمال وقالبا سحنته بإجابة مبهمة تشوبها الحسرة، لاوياً شفاهه كما المجرور بالكسرة..

" كل واحد يغلط على قد فلوسه يا حبيبتي خلينا نلم تمن الولادة ومصاريف المستشفى والمغات، والفول، والحمص اللى طفحوه"

ثم حملت حماة شوشو" جدة النونو" الغربال وهى تهزه بشدة جعلت، حبلظ، يبكي، بفتح الجاعورة، أوكما يقول الزمخشري "الناعورة"
وأمسكت، أم شوشو بيد الهون بجوار أذن حبلظ
وهى تدقه بخفوت يتبعه زمجرير الملاعق بـــ الصحون..

طق طق
إسمع كلام أمك يا أبله
ولا تسمع كلام ، أم أبوك تلك العجوز الشمطاء
طق طق
إسمع
كلام الحكومة والحزب الوطني الحاكم
ودعك
من حركة كفاية وجماعة الإخوان ومحترفي المشاكل وأروقة المحاكم
طق طق
إسمع كلام جدتك
العاقلة
وصدر، الصماء
الطرشة لـــ
كلام أبيك
المجنون
طق طق
إسمع
كلام وزير الداخلية وقوم
بدفع ضريبتك العقارية وتقديم سجلات نظيفة نقية
ولاتسمع كلام ال متهربيين وتكون إبن حرامية
طق طق
إسمع كلام الأستاذة هيفاء وهبي وقم بتقبيل الواوا
ال دح،البح ، الصح
ولا تسمع كلام الأستاذة أم كلثوم وتصون كرامتك قبل قرشك
طق طق طق.

وهجم الفتية الصغار على حبلظ وهم يتبادلون ممارسات الخطف الجماعي لأكياس الفول والحمص والشيكولاتة

بعد إشعال الشموع والدوران بها وهى

مشتعلة بالنار

وهنا وفى تلك هذة اللحظة ، إنتفض بندق مكشرا عن أنيابه، معترضاً على تلك الهتافات الخاسرة ، التي تبثها حماته فى أذن صغيره المكعبرة
ليس هكذا تؤكل كتف المعمعة أيتها الحما المتأمعة،عليا الطلاق البين من إبنتكِ المشرأبة الحواجب
لن يدق الهون إلا على أبيات الأصمعى بينما كان جالساً فوق صخرة، يناطح الفكرة فتنطحه العِبرة وهو يقول..

صـــوت صفير البلبلي **** هــيـج قلبـي الـثملي
صوت بكاء الحبلظي ***** هيج كبدي المبتلي
المـــــاء والزهــر وحبلظ مـعا **** مع زهـــــر لحظ المقلي
وانــت يـا حبلظ لــي **** وســــيــدي ومــولـلـي
فــكم وكـــــم تيـمنـي**** جـــزيل عـقـــــيـقــلـي
قطـفـــتـه مـن وجــنة **** من لـثم ورد الخجــــلي
فـقـــــال :لا لا لا لا لا **** و قـد غــداحبلظي مــــهرولـي
والخــــــود مالـت طربا **** من فعــــــل هذا الحبلظا
فـولوَلـت وولـــــــولـت **** ولــــي ولــي يا ويـلـلي

وفـتـيــة ســقـونـــني **** قــهـوة كــالعســلي
شـــمـمـتهـا بـأنـــفـي **** أذكــى من القـرنفـــلي
في وسط بستان حلي **** بـــالزهــرٍ والسرور لـي
والعـود دنــــدن دنــلـي **** والطــبل طـبطب طبلـي
طب طب طب طب طب****طب طب طب طب لي
والسقف سقسق سقلي **** والرقـص قد طـاب الي
شوا شوا وشاه شو****علا ورأس فرجلي
وغرد القمر يصيح**** ملـــلا فــي ملــــلي
ولـو تــــــــــراني يا حبلظي راكـــبا **** عـلى حـــــــمار أهزلـي
يمشــي عـلى ثــلاثــــة **** كمـشـــــيـة العـرنـجـلي
والـنـــاس ترجـم جـملي **** في السوق بالقبـقـلـــلي
والـكـــــــل كــــع كع إكع **** خـــلفـي ومن حـــويللي
لــــــــكـن مشيتها هاربا **** مـن خــشيـة العـقـنقـلي
إلــى لـقــــــــاء مــــلـك **** مـعـضـم مـبــجـــــــــلــي
يأمـــــر لــي بـخــلـعـــة **** حــــــــــمــرا كَـدَمِّ دُمّـلي
أجـــــــر فــيــها ماشــيا **** مـــبـــغــددا لـــذيـــــلـــي
انا الأديب أبو حبلظ الألــــمـــعـي **** من حي أرض اللوا
نظــــــمت قطعا في سبوعك زخرفت **** يــعجــز عــــنـها الأدبلي
أقــــول فــي مطلــعــها **** صـــوت بكاء حبلظي وصوت صفــير البلـبــل
مع تحيات أبو حبلظ لإحياء حفلات "سبوع النونو" على الطريقة الزمخشرية.

إلى هنا خيمت ظلال الصمت الأسود البهيم الأيليلي،على أرجاء الحفل
وأصيب الحضور بحشرجة فى العصب السمبساوي لفص المخ الأيمن، مصحوبة بتشنج نصفي غير متاح
حتى أدركهم الصباح والديك صاح
كوكو كوكو فى الفجرية.

وإلى لقاء متجدد مع الحلقة القادمة من يوميات شوشو وبندق
بعنوان
مغامرات حبلظ فى البلاعة!!

يوميات زوجية من حياة .."شوشو وبندق" !!

يوميات زوجية من حياة .."شوشو وبندق" !!

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

ما الذي يحدث