شمس نورها سندسى *** ساطع من سنابل حب
متضفر فى لون زنابق *** سوسنية ليها قلب
مرمرى من عطر دهبى *** فى دوامات تتعّبا عّب
********
وميّه طعمها الكافور *** مخلوط بشقايق النعمان
وموج هادى بيتمرجح *** على قرنفل فى غصن بان
يتلألأفى سحر شرقى *** يشع نور من زيت ريحان
*******
ونسيم عطره من ياسمين ***يتماوج فى ورق الورد
متزخرف فى توب بنفسج *** متزوق بطعم شهد
راكب فوق بساط سماوى *** عامل م الخمايل مهد
*******
وأرض طينها من حنة *** بطعم وريحة النعناع
وبخور جاوى من عنبر *** فى ماسة ليها الف شعاع
والوان طيف من الجنة *** فاردة فوق سماها شراع
*******
وناس معجونة بالطيبة *** وقلوبها من دهب الدهب
وشهامة وعزة نفس *** سبحان ربى اللى وهب
لما تشوف ده كله تبقى *** فى بلدى مصر أم العرب
********************
*جمال عمران *