إعتذار لمصر
أنا آسف ع اللى بيحصل يا مصر فيكى
آسف على عتمة نهارك و وحشة لياليكى
آسف على خضوعى و هوانك عليا
لانا عارف احوش عنك و لا قادر يا حبيبتى احميكى
أنا آسف ع اللى بيحصل يا حبيبتى فيكى
***************
مش عارف اكون مع مين و لا عارف امشى ورا مين
دانا من كتر تفكيرى و سهرى عنيا صبحم ورمانين
مبقتش عارف الطيب م الخبيث و لا البارد م الحسيس
و لا الخاين م الامين
ريّحينى وقوليلى مين معاكى و مين عليكى...
انا اسف ع اللى بيحصل يا حبيبتى فيكى
***************
حزب...! و جماعة...! و ملة...! و دين...!
هو عشان كدة ولادك ماتو ف الميادين...؟
و لا عشان نبقى إيد واحدة نعدم بيها ظلم السنين
و النبى........(ص)
و النبى قوليلهم كفاية لو كانوا مش حسّـين
قوليلهم مواويلك بقا ليها أنين
بيمرر حلاوة أغانيكى...
أنا آسف ع اللى بيحصل يا حبيبتى فيكى
***************
بتقولى أمدلك إيدى ؟
لاااااااا..... أنا خايف تنقطع
ايه... بتقولى خلاص السيف انكسر؟
لأ... لسه فاضل حبة جشع
لسه فاضل شوية من إياهم ...متعظوش
و لسه مالى نفوسهم الطمع
حالفين ليزرعوا المر ف اراضيكى...
أنا أسف ع اللى بيحصل يا حبيبتى فيكى
***************
مهمهومش الشهيد و عايزين دمو يروح هدر
و الله مانا عارف...
اللى ف صدورهم قلوب دى و لا حجر
يا عالم... يا ناس... يا بشر
بقى الظالم يحموه و يخافوا عليه حتى م المطر
و حاطين على بابو كوم عسكر على كوم غفر
و المظلوم لو قال آه... يدبحوه
و يقولوا قضاء و قدر.
أمانة عاجبك حالك...؟
مترديش أنا عارف و اقولهالك...
الورد ف حواضو دبل و مات على أرضو الشجر
من كتر الحزن اللى ماليكى...
أنا آسف ع اللى بيحصل يا حبيبتى فيكى
***************
أنا مش جبان...
و لا يهمنى قطع إيدى و لا حتى موتى
بس أنا إنسان.. و من زماااااان مخنوق
و اللى خانقنى كان سكوتى
أنا عايز اقولك كفاية نوم..
قومى بقى يلّا و عدى و فوتى
داكتير كانم ورا أهم حصلوكى و كمان فتوكى...
أنا آسف ع اللى بيحصل يا حبيبتى فيكى

***************
و قلت ودّعت الماضى و طويت صفحة الذل
و خلاص رجعت من تانى حر
و الربيع خلاص رجع تانى و بيضحك للشجر
و رجع الشجر من تانى يخْضر
لقيت أيادى ممدودة .. حابسة الربيع عنك
و محرّجة عليه ف سنينك تانى ميمر
عارفة دول مين ...؟
هما الشوية اللى باقولك فاضلين ...
فاضلين من (فلول) الشر
يعملوا العمايل و يرموا التهم عليا
و عيزانى أقولك بحبك..! طاب احبك عليا
دانا كل ماحاول أقولك بحبك يصعّبوها عليا
عايْزنّى اطفش واسيبك ليهم حلوة صبية
يقلعوكى توبك و سيبوكى وسط الطرق متعرية
وانا اللى ف ترابك زرعت اسمى.. لو حيلتى جلّبية
أقلعها من على جسمى..و بيها أغطيكى...
واقولك ...
أنا آسف ع اللى بيحصل يا حبيبتى فيكى
***************
صابر تلاتيــــــــــــن سنة...
و لما جيت آخد نفسى برضو بضيقونى
ميعرفوش انى الدنيا طحنانى و مطلعة عينى
وانى الطين بيسد جرحى و بلح النخل م الكحّة يداوينى
فكرينى أهبل و بحبة غلاسة حيطفشونى...
ويخلونى أفرط فيكى...
أنا آسف ع اللى بيحصل يا حبيبتى فيكى
***************
يعنى عشان جاتنى حبة شجاعة ..
لميت صحابى و عملت جماعة..
و قلت عايز حقى .. أبقى مش بحبك؟
و بزعزع كمان أمنك!
لا... و اللــــــــــــــــــه بحبك
و حبى ليكى مالو حد
بس الرزق ضاق.. و الخلق ضاق
واللقمة بقت ع القد
تبقى حبيبتى و يحضنك غيرى
و يستكتروا عليا لمسة يد
بالزّمْة داكلام يرضى حد...؟!
لو كان كدة يرضيكى قوليلى..
واعمل أنا مش شايف واغْمّى عنيا بمنديلى
وابعد بعيـــــــــــــــد ولما تعوزينى ناديلى
ولا اقولك ..كفاية بس تشاوريلى
حتلاقينى جايلك عبد..
و بمد الخطاوى مد
أمرمغ وشى ف ترابك ..واراضيكى...كدة يرضيكى؟
أنا اسف ع اللى بيحصل يا حبيبتى فيكى
***************
كنتى عروسة .. وكنتى أبية..
وكنتى بين اخواتك مفخرة
نهبوا أرضك .. و هتكوا عرضك
وسخوكى و خلّوكى بين اخواتك معيرة
و لبّسونى أنا طرحة...
و حطّوا ف ودنى حلق وف ايدى حطّوا اسورة
خلّوا راسى ف الطين..
و بقيت وسط الرجال مسخرة
عارفة إلما نضّفْتك و غسلت عارى بإيدى
ليقولوا أبوى خلف مرة
بس انتى إيه ذنبك
الذنب ذنب ولاد الـ.......
اللى عودوا لسانى ع السّب
و كرهونى فيكى و قسوا عليكى القلب
ونسّونى حتى اساميكى
أنا آسف ع اللى بيحصل يا حبيبتى فيكى
***************
شايف دموعك ع الخدود سالت
إيه...؟ هو كلامى كان واعر
يا ريت القلوب كمان تكون مالت
و صحيت جواها المشاعر
أنا مش باكتب عشان يقولوا عليا أديب..
و لا يقولوا عليا شاعر
أنا باكتب عشان لما تبكى..
أمسح بشعرى فوق المنابر..
..دموع عنيكى
واقولك.. أنا آسف ع اللى بيحصل يا حبيبتى فيكى

مع اطيب أمنياتى
عبدالمحسن على