المنظر/رجل فى سن الخمسين معلق ما بين السماء والأرض فى أعلى البرج والجميع فى الطريق المزدحم ينظرون وسيارات الأسعاف والشرطه ورجال المطافى وميكروفونات الصوت تعج بالمكان)
الزوجه/ (تصرخ)انزل يا عبده بلاش تنتحر حرام عليك العيال عايزينك
( الأطفال يبكون فى صوت خافت حزين) /انزل يا بابا حرام عليك
الأب عبد الحميد/(من اعلى)انا مش نازل مهما عملتم وهنتحر يعنى هنتحر انا مليت من العيشه دى
وزير الداخليه/ (باندهاش)يابنى اللى بتعملو ده مش
من مصلحتك عيب انزل يا حبيبى
(-رجل دين يتخطى الزحام يمسك بالمكرفون)/يا عبد الحميد انا الشيخ منصور انزل يابنى انت كده هتدخل النار هتموت كافر حرام عليك
عبد الحميد/(بغير اهتمام)ايه يعنى كافر كافر دنا عايش فى غلب بقالى خمسين سنه عايش فى فقر وضنك والعيال مطالبهم ما بتخلصشى وانا يعنى هجيب منين سبع عيال وامهم ومحدش حاسس بالغلب اللى انا فيه والمرتب مش نافع ومديون لطوب الأرض انا كده كده هموت يبقى اموت واخلص
الزوجه/(باكيه)انزل يا عبده مش عايزين منك حاجه هناكلها بملح مش هنعلم العيال هيروحو يشتغلوا من دلوقتى ويساعدوك وانامش عايزه التلاجه ومش عايزه البوتاجاز خلاص نشرب ميه من الحنفيه نطبخ على الباجور القديم بس انزل الله يهديك -(-تبكى بكاءا حارا والأولاد يبكون معها)
وزير الداخليه/(بعصبيه)اسمع كلام مراتك وعيالك يا عبده وانزل الله يهديك
عبد الحميد/ (راقصا)مش هنزل الا لما تعينونى رئيس مجلس المدينه
وزيرالداخليه/(باندهاش وعصبيه ) بتقول ايه انت اتجننت اللهم ما طولك يا روح
--لواء بجواره يمسك المكرفون/ (بهدوء)خلاص انزل واحنا هنعينك رئيس مجلس المدينه --
عبد الحميد/(يضج ويرقص)لا انتم بتضحكوا عليه
الوزير/(بهدوء واستسلام)لا يا سيدى انزل وهنعينك رئيس مجلس المدينه واشمعنى يعنى مجلس المدينه
عبد الحميد/ (يضج ويقف صلبا)والشوارع تترصف من جديد وتتوسع ونشرب مياه حلوه ومفيش ظابط مرور يمسك الغلابه ويعملهم مخالفات ومفيش حد يلفق التهم للغلابه اللى بيبيعو فى الأسواق ومحدش يمنع حد من اكل العيش وتسيبوا الناس تاكل عيش كفايه غلب بقى والأسعار تنزل ويبقى كيلو اللحمه ب5جنيه والبطاطس بريال زى ما كانت والتعليم ببلاش ومفيش دروس خصوصيه ومفيش ظلم ولا رشاوى ولا محسوبيه ولا كدب ونفاق وكل واحد ياخد حقه بالقانون
وزير الداخليه/ (باستسلام)حاضر طلباتك اوامر انزل بقى
عبد الحميد/(يرقص ويتمايل)لا مش نازل انتم بتكدبوا عليه -
(-الشارع مزدحم والناس متجمهرين امام البرج والأم وابناءها يبكون ووزير الداخليه متقزز وقرفان والجو حار والشمس حارقه)
عبد الحميد/(باهتمام وبصوت جهورى) مش هنزل الا لما تعينونى محافظ
وزير الداخليه/(بجنون)ايه انت هتعيش الدور يا مجنون انت
--لواء شرطه يتناول المكرفون /(بجديه)حاضر يابنى بس انزل هنعينك المحافظ
عبد الحميد/ (صلبا وباهتمام)والناس اللى ملهاش بيوت تدوها بيوت تبنى وتساعدوهم ومتعملوش لهم قضايا وتحبسوهم وتحاسبوا الحراميه اللى بيسرقوا اراضى الدوله وبيبعوها بملايين من دم الغلابه وتخدو منهم الأرض تانى وتدوها للغلابه اللى عايشين فى الخرابه واللى بيوتهم وقعت عليهم وتبنوا لهم بيوت جديده على حسابكم وتحاسبوا الحراميه اللى بيسرقوا المال العام وتسجنوهم وتفتحوا البنوك وتساعدو الفقراء وتدوهم قروض عشان يعملوا مشاريع ويتجوزوا ويبنوا لهم بيوت ينامو فيها وتحبسوا اللى سرقو البنوك وتاخدو الفلوس منهم تدوها للمحتاجين والفقراء وتوزعو الثروات عليهم بالعدل وتسيبوا الفلاح يزرع زى ما هوه عايز ومتخدوش منه المحصول ببلاش وتدولو اللى هوه عايزه ومتمنعوش عنه الملح والسماد والتقاوى وترفعو المرتبات جامد والموظفين الغلابه ياخدو حقهم فى العلاج والرعايه الصحيه والاجتماعيه والموظفين العاديين ياخدو كل بدلاتهم وترفعو اجورهم واللى فى القطاع الخاص ما تستعبدوهمشى وياخدو حقهم كله وتزودو اجورهم وما حدش يطرد حد من الشغل ومفيش خصخصه تانى
وزير الداخليه/ بغيظ) اللهم ما طولك يا روح انت عايز تغير الكون يا بنى فى ساعه انت مين انت روح انتحر فى ستين داهيه
--الأم وابناءها يتعلقون بقدمى اللواء يبكون)
يمسك اللواء بجانبه المكرفون/خلاص يا عبده انزل واحنا هنعمل كل اللى انت عايزه
عبدالحميد/لا انتم نصابين بتكدبوا عليه مش هنزل الا لما تعينونى مدير الأمن
الوزير/ (بعصبيه وصراخ)ايه يا روح امك مدير الأمن كمان يقترب منه رجل الدين -
-رجل الدين/ بهدوء واستعطاف)(يا عبده انزل كل واحد عارف شغله انزل ربنا يهديك
--وزير الداخليه/ (بقرف)سيبوا يا شيخ منصور مش عايزينه
اللواء/ باهتمام)يا افندم نريحه ما ينفعشى نسيبه الناس هتقول ايه شايف العالم قد ايه دول يجى 100الف واحد بقت فضيحه الناس تقول علينا ايه
الوزير/ )رافعا صوته بجديه)خلاص انزل واحنا هنعينك مدير الأمن
عبد الحميد/ يرقص ويضج)(والشرطه تبقى فى خدمه الشعب فعلا ومفيش اعتقالات ولا قانون طوارىء ولا تلفيق تهم ولا رشوه ولا محسوبيه ولا ده ابن وزير وده ابن غفير الكل زى بعضه فى العلم ولا سرقه ولا غيره ويكون فى عدل بين الناس ومساواه فى الحقوق والواجبات
الوزير/حاضر يا عبده يا بنى اللى انت عايزه
رجل الدين/انزل بقى يا عبده خلاص الباشا امر -
-الأم تبكى والأولاد يتعلقون بالشيخ منصور
عبد الحميد يرقص ويغنى ويدب برجليه /لا مش هنزل الا لما تعينونى وزير الصحه
الوزير/ (ضاحكا بتعجب)كمان وزير الصحه
الشيخ منصور/ريحه يا باشا ده باين عقله خف واتجنن
الوزيرلاخر /قله ماشى ريحوه يا جماعه
عبد الحميد/اه والعلاج ببلاش ومفيش فرق بين غنى وفقير ومفيش سرقه فى الدواء ولا سرقه للاعضاء والتجاره بها ومفيش وزير يتعالج ببلاش وينصب على الناس عشانه وزير ويروح ايطاليا يتفسح والغلابه يموتو عشان ممعهومشى فلوس ويتعمل مستشفيات للفقرا والغلابه ببلاش فيها كل حاجه متوفره
الشيخ منصور/حاضر يا عبده انزل بقى كفايه تعبتنا
عبد الحميد/لا انتم شله نصابين بتكدبو عليه انا مش هنزل الا لما تعينونى رئيس مجلس الشعب
الوزير/ بتعجب)(يا ه فاضل تتعين مكانى يابنى انزل عيب الدنيا حر وانا مش مستحمل
عبد الحميد/اه ويكون فيه حريه للفكر والراى والناس تقول اللى هيه عايزاه وتنتخب اللى هما عايزينه ومفيش تزوير واللى يزور ينسجن ويبقى فيه احزاب ومعارضه حقيقيه ومفيش وساطه او محسوبيه والعضو اللى يغلط يتقدم للمحاكمه والعضو اللى يسرق واللى يعمل اى جريمه ما لهوش حصانه ويتعاقب واللى الشعب عايزه يمشى ويتعمل استفتاء على القوانين والخدمات والشعب اللى يوافق عليه وفى نزاهه من غير تزوير والقضاء يراقب الانتخابات والاستفتاءات ومحدش يدخل فى اراده الشعب والرئيس والحكومه تتحاسب لو غلطت ويتقدمو للمحاكمه ومفيش حد احسن من حد وكله زى بعضه غفير زى وزير
الوزير/ باستسلام) ماشى حاضر يا عبده انزل بقى
الجميع ينظرون من اعلى ينزل عبد الحميد الدور العاشر ينظر من اعلى ويدب برجليه ويرقص ثم ينزل الى الأسفل والجميع ينظرون له وزوجته ترتمى فى احضانه وابناءه الصغار السبعه ويبكون
الزوجه/ (باكيه)حمدالله على السلامه ليه كده بس يا عبده
ينظر لها عبد الحميد باكيا ويحضن ابناءه يقترب طبيب ومعه عده ممرضين ويلبسونه لباسا ابيضا ويركب سياره مستشفى المجانين
الوزير/ ناظرا للجميع صارخا)خلاص مش عايزين تجمهر كل واحد يشوف شغله -
-الجميع يتركون المكان بينما ابناءه وزوجته يصرخون --ستار