السَّعْد الْمَتْبُوعْْ

گَالُو عْلِيَّا مَسْعُودْ ، وُالزّْهَرْ عْلِيَّا طَايَحْ
جَاوْبْتْهُومْ ، سَعْدِي مََذْبُوحْ ، ذَابْحُو الذَّابَحْ
لاَ وْجَهْْ مَبْشُورْ، لاَ گَلْبْ يْسَامَحْ
كُلْ فَعْلِي شِينْ ، مْمْقُوتْ ، غِيرْ صَالَحْ
مَنْ دُوَّارْ لَخْلاَ أَصْلِي ، فْرَاسْ لْكُدْية مَنْزْلِي
لاَ كْلاَبْ تَتْنَابَحْ ، لاَ بْگَرْ تَتْنَاطَحْ
كُلْهَا يْگُولْ فَصْلِي ، لاَ قُومْ تَتْنَاصَحْ
گَالُو فْ تَبْدَالْ لَمْنَازَلْ رَاحَة ، گُلْتْ نْبَدَّلْ يَمْكَنْ نَرْتَاحْ
لْگِيتْ الرَّاحَة مْخَاصْمَانِي ، دَخْلاَتْ سُوقْ رَاسْهَا ، سَادَّاهْ بْ مَفْتَاحْ
مَصَّابْ مَنْ السَّعْدْ غِي رَشََّة ، مَنْ كُمْْشَة ، وُنْرَاهْ بْعِينْ مْعَمْشَة ، يَهْدَاوْ سْقَامِي ،
تَبْرَا لَجْرَاحْ
تَنْتْصَبْ قَامْتِي ، تَرْتْفَعْ هَامْتِي ، تَتْعَدَّلْ گَانْتِي ، نَتْعَافَى ، نَصْحَاحْ
وْرَايْتِي مَنْ بْعِيدْ تْشَالِي وْتَتْلاَيَحْ
يَآلْلاَّهْيِيِنْ بْسِيرْتِي ، قِيلُو عْثَرْتِي ، كُولّْكُومْ ، عَوْرَاتْ وًفْضَايَحْ
إِيْلاَ نْعِيدْ زْبَايْلْكُومْْ ، نْعَمَّرْ آلْفْ كْتَابْ ، مْدَقَّقْ ، مْشَرَّحْ شْرَايَحْ
لاَتَبْقَاوْشْ فَسْيارْ النَّاسْ تَتْنَاتْفُو ، سِِيرُو اللهْ يَعْفُو هُوَّ يَصْفَحْ وُيْسَامَحْ


المريني ادريس

القصر الكبير بتاريخ :16 / 07 / 2012