عواصف يا امير
أصبحت البندقية
لقمة طرية وعيشة
هنية
صرنا ندور مثل ...
بلا ما نقول
على لحمة , عظمة
ويمكن صحن
فول
قولها رايح
زمن حكي
زمن أرانب
يعني بالعربي
بعنا ومن دون
مانقبض
لا جبنا يافا
ولا حلحول
على حطت ايدك
وينها ايدك
ضاعت من رحت
بوصلتنا
بعدك أوسلوا
مناطق قسمتنا
والقدس في محرابها
والعرب
هي هي في نومتها
بتسمع في ربيع
وفي دين
عم ع الجميع
كذبة وترابك
وبعد ما كان
الشجب والاستنكار
أصبح موت
وخراب ديار
لا دين شايفين
ولا نخوة صلاح الدين
يمكن قولك
بستنوا في التمكين
يمكن ويمكن
بخططوا لليهود
المساكين
يغافلوهم في
عيد الغفران ولا
ف عيد المساخر
ولا في عيد الدولة
والتوطين
أقلك أرجعلك
من أول قولها
رايح
لسا في سؤال
محيرك
وفي دانك
ما بنيمك في
تربتك وكأنه جرس
وطنين
اوعى تقلي حق
العودة واللاجئين
بزعل ما انسناها
بس ع الرف
من سنين
بنوعدك ما ننساها
بس يارب
يظل بعض
من ختياريتنا وجداتنا
وعكازهم ولثواب
لمطرزة بالحرير
والحارة
وبعض الدكاكين
ل انه ف هالبلد
يا أمير أبصر
نصل للستين
هي يدوب أربعين
نعيشهم
مستورين
سرطان وحرق
وانتحار
بشوية بنزين



اسمعت انه في
قائد تخلى
ومابدوا يعود
مع العايدين
هو حر
أصلوا خلاص
باعها بشوية
ملايين
وميزانية فارطة
ورتب
واحنا قاعدين
باسم سلطة فارغة
وشوية نياشين
كان لازم رحيلك
يكون
عشان يصير هالزمن
الملعون
زمن لا طعم ولا
ولا حس ولا لون
نام يا أمير
وترحم علينا بدل
المرة ألف
مليون