الوشوش وقعت
قصيدة بالعامية المصرية
شعر : عاطف على عبد الحافظ
*****
كل الوشوش وقعت
وبانت حقيقة الوشوش
واللعب ع المكشوف
مين خان وفتح المزاد
لبيع الأرض والحدود
لأن الوطن ميهموش
مين فتح للكدب دكان
يبيع الوهـــــــم فيه
ويتاجر كمان بالدين
لا خفتوا من ربنا
ولا شعرتوا بكسوف
طلعتوا ع الشاشات
بوجوه كئيبة ودقون
جايين تضحكوا علينا
وتتكلموا فى الدين
طول عمرنا مسلمين
قبل ما نبتلى بيكم
بمئات الســــنين
وشوشكم العكره
مش زى وشوشنا
المصرى دايما
وشه بشــــــوش
ونفوسكم مريضة
وعقولكم عليها تشويش
*****
قتلتوا ولادنا وجنودنا
فى سينا وكل مكان
الصهاينه بقوا حبايبكم
وكمان الأمريكان
قلتوها واضحة زمان
طز فى المصريين
نسيتوا عروبتـــكم
وخنتم فلســـــطين
ازاى تقولوا احنا عرب
وازاى تكونوا مسلمين
ارهابكم مش هيرعبنا
طول عمركم غدارين
مالكوش مكان بينا
لازم ترجعوا الجحور
شمس الحقيقة سطعت
ومسحت كل الرتوش
كل الوشوش وقعت
وبانت حقيقة الوشوش
*****
عاطف على عبد الحافظ
كاتب وشاعر مصرى