تويت
ريحة لبلاد
خلاتني نركب لعواد
ونجي نشوف لجواد
تفكرت كْلاسي جنب لواد
مع اصحابي نجمع لعواد
نستمتع ب الطير لغراد
وتحت الشجرة
شحال شبعت ركَاد
للساقية كنت طالع هواد
كتبت حروف ب مداد
عشقي وحبي لبلاد
ف كل عيد مَ الاعياد
نتفكر جْماعة
عل الصينية ولبراد
وحديثنا لفريد عل الاجداد
جاهدوا وكانوا ناس شداد
وقْفوا لعدو ب لمرصاد
نتفكر زمان
بحرقة وتنهاد
ونكُول:
فينك يا الرحبة لخضرا
وديك لالاّ مولاتي الشجرة
بجنبها بنعمان وعبير لوردة
اللي كان سقامي بها يبرى
وتخفف ما ف لقلب من كربة
كل حاجة ولات جذبة صفرا
فينك يا الساقية لجارية
لجوف لعطشان راوية
بخرير لْمَا داوية
لعروق الارض ساقية
دار الزمان واصبحت خالية
لْ حياة بلا بيك فانية
فين الضحكة ولقلب الصافي
مع لَخوال ولَعمام وخا ب لخبز لحافي
لبركة ما خطات وحدْ ما يجافي
مجموعين ف الشتا والصيافي
تفرقوا لقبايل وسكنوا لفيافي
ما بقات غير الذكريات وصافي