ف الليل
وامع اسكات الليل
تانسمع صوت تايلاغي
اعلى باب ادماغي
يضرب ضربات
انحل
يدخل
امزجل
جايب اعشاه وباغي يبات
هو
من خطواتو
تتمايل ذاتو
من كلمتو
اتدردب احريفاتو
من اعيونو
شوفة وبمرود اللغى كحلات
يجلس
بعطفو اعليا انحس
هو اعشيري
هو اخليلي
حرفي وجا يعمر اخوا ليلي
ويحيي ليالي الانس
وايام الاندلس
اللي بوثرة من اراب امشات
شي يغني اعلى لالاه
وقيس اتجنن بحب ليلاه
وانا من حرفي نتبرك وانكول شايلاه
شعلات شمعتي وباحجر امقطر ينزل دمعات
يزجلني
يخلخلني
وبمغزل يغزلني
كبة
بالف سبة وسبة
اخيوطها من ادماغي تطلع وتنزل شلا عكبات
من قاع اقرابو
يطلع اشرابو
حرف هو ولف ويسقيني اكويسات
يكب ويسقيني
ف زينة حرفو يديني
نتمايلوا احريفات
واعلى اسطور الورقة انطيحوا اكليمات
انشوف فيه
فيا يشوف
ضو اظلامي مكشوف
هاذي اتجيب وهادي اتدي
حتى انشد السانو بيدي
يحط راسو اعلى كتفي
ومن اقرابو يهز ويحط ف كفي
كفي ف حرفو حتى انطلعوا اصبع
عاجباه لوناسة ومن لكتابة ما يشبع
حتى يوذن فروج باصياح
ويطل لفجر جايب امعاه اصباح
وبين اصياح واصباح
لقصيدة تدير نقطة ولقلم يكول كملات
يجمع اقلوعو
امواعدني بارجوعو
ومن اهموم غايغرف ويشبع جوعو
ويرجع انهضروا الليل الغارق ف ابحور السكات

عبد الفتاح بوهو