همس الحروف

كثر لكلام يحير
شحال يكفيك باش تفهم
وكلشي يلغي بلغاه
...
وانا عشقي فالصدق
إلى جاني يحرك النظم
ويسقي الكلمة بصفاه
...
شحال كد الغافل
يسوس فالدنيا يحكم
والقوم تدعي بخلاه
...
إلى حبيت انا فيوم
قلبي نهديه للي يفهم
مأصل بالحق جدرو محلاه
...
كل يوم نرسم حرف
بين سوايعي ونزمم
نرج المعنى اللي يبلغ صداه
...
إلى نكول غي المليح
نصفي قبل ما نتكلم
المليح ديما يوصل باين مرساه
...
الحروف تتحرك زاهية
تهتف بالحق محزم
بناس الكلام الهايمة فهواه
...
ناس روات القلوب
بمحاسن الكول والنظم
تكلع على المنكوب شقاه
...
الزمان و المكان
وناسهم سمعات تحكم
كلامهم يا وليف كلشي عراه
...
هجاو ومدحو
ورسموا بالقصايد الحلم
شي فرح وشي يا وعدي بكاه
...
هادي حروف همسات
فليل مكتف بالهم
سال صحاب الحال تعرف مكواه
...
وحروفي عاشقة
مزروعة فالحلم
اللي ترسم فالقصايد تهواه
...
عبدالعالي 2013/12/09