تويت
ذَاكْ الطّْفَل
ذَاكْ الطّْفَل
**************
كَان طايَعْني وتْبدَّل
كيف لْخاتم فَ صْباعي
ليُوم تغيَّر وتْحَوَّل
مابْقاش ملْكي ومتاعي
عْييِت مانْسقْسي ونْسوَّل
مالْقيِت يَانَاسْ سمَّاعي
عقْلي عْليه عاد مخبَّل
كيف نردُّو لَ تباعي
خايْفة يَآنَا نتهبّل
يْضِيع سنْدي وذْرَاعي
نْصَحْني قَلْبي نتْمهَّل
تْجاوبْت وْقُلت نْرَاعِي
جاتْني خْبارُو ملْفُوفَة
خبَّرْني بِيها السَّاعِي
لْواتْ عْليه لْمَكْشُوفَة
سَرْحَاتُو كِيفْ الرَّاعِي
بالشَّعْوذة مَوْصُوفَة
ماتَحْشَم وَلا تْرَاعِي
حَرْت مْعاها آشْ نَعْمَلْ
بْلاَ مانْبدل طْبَاعي
قُلْت نسْمَح فِيه يَتْبهْدَلْ
تَايْعُود يْجِينِي سَاعِي
كانْ طايَعْني وَتْبدَّل
كيفْ لْخاتم فَ صْباعي
ليُوم تغيَّر وتْحوَّل
مابْقاش مَلْكي وَمْتاعِي
*************
المريني ادريس
القصر الكبير بتاريخ : 24 / 04 / 2014