تويت
آشْْ بْغِيتْ بيكْ
آشْْ بْغِيتْ بيكْ
ايْلاَ مابِيكْ مَا عْليكْ
لْوادْ اللِّي جَا يَدِّيكْ
آشْ بْغيتْ آنَا بيكْ
آنَا بَاغْية سُلْطَانْ
عقْلُو رْزِينْ وْفتَّان
ماشِي هْبيلْ وْزرْبَانْ
نْديرْ ليهْ فْ قلْبي مْكانْ
ورْدَة وسْطْ لْبُسْتانْ
نْحطُّو عْلَى رَاسِي تََاجْ
مانْخلِّيهْشي مَحْتَاجْ
لوْفا عنْْدُو ف الدَّم
قاري مْليح ، متْعَلَّم
مايْقُولْ حتَّى يْخمَّمْ
وْهاذْ لخْصالْ ماهِي فِيكْ .
**********************
سَمْحِي لِي يَا لَغْزالَة
فْ هَاذِي نْقُولَّكْ لاَ لاَ
رَانِي مازَالْ صْغِيرْ
اللاَّ يْجِيبْلكْ التِّيسِيرِْ
رَانِي مَابَاغِي مْرَا
مَازالْنِي كَ نَقْرَا
وْعقْلِي طَايَشْ بَرَّا
اللهْ يْجِيبَكْ عْلَى خِيرْ
ايْلاَ نْتِ خايْفَة لَعْْنُوسَة
أوْ غَيّرَاتَكْ شِي عْرُوسَة
عَرْفِي راسَكْ منْحُوسَة
وْنُوضِي جَرِّي عْلَى وَعْدَكْ
آنَا ماشِي منْ سَعْْدََكْ
آشْ بْغيتِي بِيَّا
سِيرِي شُوفِي اللِّي يْلِيقْ لَكْ
*******************************
المريني ادريس
القصر الكبير بتاريخ : 22 / 04 / 2014