تويت
بْصَرَاحَة ولمَنْ يهُمُّه الأمْر
بْصَرَاحَة ولمَنْ يهُمُّه الأمْر
**************
عْلاَشْ عْليكُوم يآالزَّجَّالا
كِي لَعْيالاتْ كي الرَّجَّالة
لَعْوافي بينَاتْكوم شعَّالة
باش تطْفيوْها، تْقُولولاَ لاَ
وادَّلِّيو لحْطبْ ف دْخَالاَ
هاذْ لحْيُوطْ مَاشي مغْسَلَة
صَرْخو وصْراخكُوم يتْعَالاَ
بيناتْكُوم حاصْروهْ ف نْوَالَة
لاتْنشْروه لْمَن مَا وَالاَ
خلاصْ مابْغينَا مازَالْ مهْزلَة
لا تنْسَاوْش لْمُوتْ قَتَّالَة
ونْبَالْهَا بْ لحْصَادْ شَغَّالَة
كَ تْغيَّبْ وشْحَالْ منْ حَالَة
فينْ الرَّاشَقْ وْشَهْرمانْ
وْلعْلجْ اللِّي بِينَاتْنَا كانْ
فينْ لْعَربي وْفينْ بُوجْميعْ
وَمنْ مْثَالهومْ راحُو جْميعْ
لا تْكُونُو ناوْييِن لخْلُودْ
اللّْحَمْ والدَّمّْ غ يَّاكْلُو الدُّودْ
بَصَّحْ فْعَالْنا خالْدة شْهُودْ
امَّا احْنَا يَا مَنْ تتْعَالاَ
مَا دَايْمِينْ كُلْنَا رحَّالَة
****************
المريني ادريس
القصر الكبير بتاريخ : 22 / 08 / 2014