كتبنا الشعر ما نبغي شواهد = ولا عين اتمعّن او تشاهد
نماخر في بحار الجزل حتّى = نطوف الذوق طوفة ابن ماجد
ذخرنا الشعر للذوّاق صرّة = حواها ماي للظميان بارد
وهذا الشعر ماهو شعر باك ٍ = ولا شعر ٍ غزل أو شعر جامد
شعر كلّه معزّة في معزّة = فخر أعدائه اقلوب ٍ حواسد
يحس صمّ الصخر بأنفاس شعري = ويصفى منْه نهر ٍ بات زابد
طواريق الشعر عندي كثيرة = تعدّد طرقها والجزل واحد
ترى شعري لمع في رسغ عذرا = شعر لكن ذهب يسبي العساجد
تشوف أشعاريا عين الكفيفي = وتلفت من غدى بالفكر شارد
اذا جبتوا شعر يسوى قصيدي = عرفت إنّ الكذب في الكون واجد
تفرّد شعريا في الكون كلّه = دليلي أنْ قصيدي اليوم خالد
يردّده المطر من فوق جدبا = يدندنه الهزيم ف جوّ راعد
يناغيه الضيا وسط الدياجر = ويصحى منْه جسم ٍ بات هامد
نعم شبيك يا لبيك شعرك = فركت الحسّ و الجزلات مارد
ظهر لي وقال وين آحط حسّك = وشعرك قول وآنا اليوم واعد
أحط شعرك على روس العوالي = أو أرقى به على آذان جاحد
فقلت:اركد مكانك هالثريا = لجل شعري انزلت و البدر قاعد
وأنا ألقي الشعر ما دق بابي = سوى من مشتريها لا عطارد
اذا تنزل كواكب كون ربي = لشعري ويش أبا أو ليش أعاند
نعم آنا الشعر وآنا شعوره = وقلب الشعر والشعر المجاهد
لو ان الشعر يسجد باحترامه = تشوفه لجل فكري خرّ ساجد
مجالس فخر صغناها قوافي = دواشقها جزايل و المساند
تسندها خفا في الليل شاعر = لو ان شعره عظيم ايتمّ زاهد
يطول الشعر منّي بسّ وقتي = على صوغ القصايد ما يساعد