تويت
1
بترقص علي أغنية لأم كلثوم وهو مش بيعجبه الرقص لكن بيعجبه أكتر أم كلثوم،وبيسرح بيروح لزمن تاني،وبيقف قصاد أم كلثوم وبتقوله وهي بتبص في عنيه "أمل حياتي يحب غالي"،بيعيط هي بتمسح دموعه،بيفوق من شروده بيلقي لسه سعاد بترقص،بيقولها "غني" وهي صوتها مكنش حلو،قالتله"انا بعرف ارقص احسن"،قالها "انتي هتعرفي تغني احسن منها"،غنتله "الحياة بقي لونها بمبي ورقصت"،معجبوش اتنرفز،ولع سيجارة،مبيحبش المزيكا الكلاسيك،قالتله "تتغدي"،بصلها وقالها "لما تعرفي تغني احسن منها"،ضحكت رقصت تاني وغنتله "ياواد ياتقيل" وساعتها هما الاتنين انبسطوا !!
2
وانا نازل من المترو بالصدفة شفتها،الست سعاد بكل جمالها وحكتلها اني كنت معاها ،قالتلي وانا كنت معاك،اتمشينا سوا في وسط البلد،وعزمتها علي ايس كريم في جروبي،طلعت علبة السجاير وكانت عايزة تدخن قلتلها لأ،قامت ورقصت في الميدان وكل الناس رقصوا وساعتها حسوا فجأة انهم عاوزين يعملوا ثورة،ثورة الرقص،انا عمري ما رقصت تانجو قبل كدة بس في لحظة ما الشمس كانت رايحة تغرب،سعاد شدتني من ايدي وقالتلي يلا نرقص !!
3
قهوة سادة وقميص اسود والنور قاطع،وانا بغني في سري وقاعد علي كرسي لوحدي،انا مش مصدوم ان السعاد مش هنا،ان مصدوم ان الثورة منجحتش،فيها ايه لو سبونا نرقص زي الحمام في السما،النور جه بس كانت لسه الدنيا مضلمه او ان حستها كده،فيه بنت كانت قاعده بتشيش،بصتلي وقالتلي مش كفاية سجاير وقمصان سودا وقهوة سادة،بصيت الناحية التانية ومهتمتش بكلامها،قامت من مكانها،كسرت كوباية القهوة السادة جدا،شالت من علي عيني النضاره،وشدتني من ايدي وقالتلي يلا نرقص،مسمعتش كلامها بس قمت وكسرتلها الشيشه وقلتلها انتي اللي بدأتي،عيطت واول مرة اشوف دموعها،خدتها في حضني ورقصنا بس محدش قلدنا المرة دي،النور قطع فخدنا جمب وسبنا صوت النشاز يملا الجو !!
4
المرة دي صحينا بدري وروحنا الميدان،الوطن ملوش علم واحد والوطن ملوش نشيد واحد،همستلي وقالتلي "مش لازم نبقه عصافير عشان نطير" قالتلي "يلا نرقص والناس هتقلدنا المرة دي،حتي لو الغربان حاموا حوالينا في الجو" غنت هي المرة دي غنت اغنية عادية جدا بس كان فيها اسمك يابلادي،وانا من كتر الانبساط رقصت وهي رقصت كالعادة كأنها اخر أميرات الارض،شويه واتجمعوا حوالينا الناس وآمنوا بأنهم طيور لابد لهم من سما عشان يعزفوا لحن الحياة والمشهد طبعا ميكتملش غير بوجود الغربان،بصتلي "وقالتلي مفيش نجاح من غير تمن" وغمضت عيونها عشان تنام الاميرة المبجلة وعشان الناس تكمل رقص وتغني،ساعتها غنيت اوي عشان الوطن محتاجله دايما غنوه وعزف !!
بترقص علي أغنية لأم كلثوم وهو مش بيعجبه الرقص لكن بيعجبه أكتر أم كلثوم،وبيسرح بيروح لزمن تاني،وبيقف قصاد أم كلثوم وبتقوله وهي بتبص في عنيه "أمل حياتي يحب غالي"،بيعيط هي بتمسح دموعه،بيفوق من شروده بيلقي لسه سعاد بترقص،بيقولها "غني" وهي صوتها مكنش حلو،قالتله"انا بعرف ارقص احسن"،قالها "انتي هتعرفي تغني احسن منها"،غنتله "الحياة بقي لونها بمبي ورقصت"،معجبوش اتنرفز،ولع سيجارة،مبيحبش المزيكا الكلاسيك،قالتله "تتغدي"،بصلها وقالها "لما تعرفي تغني احسن منها"،ضحكت رقصت تاني وغنتله "ياواد ياتقيل" وساعتها هما الاتنين انبسطوا !!
2
وانا نازل من المترو بالصدفة شفتها،الست سعاد بكل جمالها وحكتلها اني كنت معاها ،قالتلي وانا كنت معاك،اتمشينا سوا في وسط البلد،وعزمتها علي ايس كريم في جروبي،طلعت علبة السجاير وكانت عايزة تدخن قلتلها لأ،قامت ورقصت في الميدان وكل الناس رقصوا وساعتها حسوا فجأة انهم عاوزين يعملوا ثورة،ثورة الرقص،انا عمري ما رقصت تانجو قبل كدة بس في لحظة ما الشمس كانت رايحة تغرب،سعاد شدتني من ايدي وقالتلي يلا نرقص !!
3
قهوة سادة وقميص اسود والنور قاطع،وانا بغني في سري وقاعد علي كرسي لوحدي،انا مش مصدوم ان السعاد مش هنا،ان مصدوم ان الثورة منجحتش،فيها ايه لو سبونا نرقص زي الحمام في السما،النور جه بس كانت لسه الدنيا مضلمه او ان حستها كده،فيه بنت كانت قاعده بتشيش،بصتلي وقالتلي مش كفاية سجاير وقمصان سودا وقهوة سادة،بصيت الناحية التانية ومهتمتش بكلامها،قامت من مكانها،كسرت كوباية القهوة السادة جدا،شالت من علي عيني النضاره،وشدتني من ايدي وقالتلي يلا نرقص،مسمعتش كلامها بس قمت وكسرتلها الشيشه وقلتلها انتي اللي بدأتي،عيطت واول مرة اشوف دموعها،خدتها في حضني ورقصنا بس محدش قلدنا المرة دي،النور قطع فخدنا جمب وسبنا صوت النشاز يملا الجو !!
4
المرة دي صحينا بدري وروحنا الميدان،الوطن ملوش علم واحد والوطن ملوش نشيد واحد،همستلي وقالتلي "مش لازم نبقه عصافير عشان نطير" قالتلي "يلا نرقص والناس هتقلدنا المرة دي،حتي لو الغربان حاموا حوالينا في الجو" غنت هي المرة دي غنت اغنية عادية جدا بس كان فيها اسمك يابلادي،وانا من كتر الانبساط رقصت وهي رقصت كالعادة كأنها اخر أميرات الارض،شويه واتجمعوا حوالينا الناس وآمنوا بأنهم طيور لابد لهم من سما عشان يعزفوا لحن الحياة والمشهد طبعا ميكتملش غير بوجود الغربان،بصتلي "وقالتلي مفيش نجاح من غير تمن" وغمضت عيونها عشان تنام الاميرة المبجلة وعشان الناس تكمل رقص وتغني،ساعتها غنيت اوي عشان الوطن محتاجله دايما غنوه وعزف !!