تويت
&&&&&&&&&&&&&&&&
زوبة يا زوبة
زوبة يا زوبة دي آخر نوبة وانا حرمت نويت التوبة
ولا عمري راح امسك طوبة ولاعدت العب يوم في الروبة
انا حرمت خلاص وخلاص هاسمع كل كلامكو يا ناس
وابدا عملي بالإحساس وابقي لكم بعدها اعجوبة
***********
انا حرمت العب بالنار وامسك ديل ارنب او فار
واكسر رجلين الكرسي او امسك ابدا منشار
انا حرمت اهرب لبعيد وحدي وسيب الكل وحيد
وانا حرمت ان ابقي عنيد وساعتها ارجع بصعوبة
انا حرمت اغمض عين وانسي الصح واقول انا فين
والطم بعدها عا الخدين واعمل م الإنسان العوبة
والله حرمت يا زروبة
**************
الواد الطيب يا جماله بيحافظ دايما علي ماله
ولا عمره بيتبهدل حاله ولا عمرك راح تلقي مثاله
***
الحاجة بيحسبها بعقله ويخاف علي زملاؤه وفصله
ولا تلتقي بعده ولا قبله واهي بكرة الايام جايا له
دايما خايف علي كراسته ويبوس ايد بابا ومامته
ولا عمره بيزعل اخته ويخلص علطول إشكاله
في الفصل بيظهر مجهوده وبتشعر دايما بوجوده
وتحس بإخلاصه وجوده بالحب بيظهر بدلاله
ولا عمره بيغير حاله
وبيسال ببساطة وحكمة يتكلم تشعر بالهمة
ما هو عايز يوصل للقمة يا حلاوته لو هل هلاله
والواد الطيب يا جماله
**********************
يا ربي تخلي محمود
يا ربي تخلي محمود رمز الحب ورمز الجود
ف قلوبنا بتلقاه موجود يا حلاوته اخر العنقود
*****
يجري يشب يطول الرف والكرسي يخليه ف الصف
فوق العجلة ما يشبع لف وبيمسك باديه العود
جده ونينه يحبوه موت ياكل الملبن والبسكوت
ومعاهم يفضل مبسوط وكإنه سكر معقود
وعلي الراس بيحط الكاب يمسك إيه دفتر وكتاب
ويحط حاجاته ورا الباب ويبوس إيد عمنا مسعود
عمره ما يوم بيبطل لعب وعلي الكرسي يقف ويشب
وبرجله علي الأرض يدب ولا يتعبه كتر المجهود
محمودنا سكرنا زيادة وبيمل لنا حياتنا سعادة
وبنفرح به فوق العادة وبحبه علي الكل يسود
واتصور مع اخته خلود
*******************
احمد ومحمد وسمير
احمد ومحمد وسمير دايما يلعبوا بالتباشير
ولا يسمعوا لكلام الغير ولا بيحبوا اي نصيحة
جه مرة يتشاكلوا عليه احمد واحدة جت في عنيه
قالوا انا مالي اعمل ايه قام هارب علي خالته سميحة
ومحمد مسك المعجون دهن الحيطة وحط اللون
وسمير نط من البلكون ومحمد كسر التسريحة
******
بيناموا دايما في الشارع ويقولوا دا ما فيش مانع
بالشبشب بيخشوا الجامع ويخلصوا ف ازازة الريحة
احمد صلي المغرب خمسة اما العصر يسيبوا ف خلسة
يرموا هدومهم بعد اللبسة وبيعملوا م الحبة فضيحة
******
ف الفصل ما بيحبوا يذاكروا لو تطلب حاجة ما يفتكروا
لو شافوا الأستاذ راح يجروا ويسبوا في الابلة مديحة
****
قام بابا راجع م الخارج قال انا راجل أهبل ساذج
ولنور التقويم بقي سارج ونصايحه جامدة وصريحة
الوقتي تشوفهم تتسر تشاركهم ف جميع الأمر
ومعاهم راح تكتب شعر والصحبة راح تبقي مريحة
****************
شوف الدنيا
يا عصفور اخرج واتحرر واجري وشوف الدنيا ودور
علي اغصان الأرض وفكر يا عصفور اخرج للنور
شوف الدنيا كبيرة جميلة اوعي تسيب النفس عليلة
دا الأيام بالفرح طويلة واملا حياتك هنا وسرور
يا عصفور اخرج واتمتع اوعي تعيش مذلول متلوع
ولاحزانك تبني وتسمع وتسيب الأفراح بالزور
يا عصفور الدنيا ربيع اوعي تكون لليأس مطيع
ولا لجمال البسمة تبيع وتنام ويا الجفا مذعور
يا عصفور اخرج للنور
****************
مشمش وابو قردان
مشمش مشمش وابو قردان راحوا يجيبوا م الدكان
رز وعدس وبرنجان
قام مشمش قال له هات زيت علشان ماما ونينة يا ريت
علشان ياكل اهل البيت قام جايب زيت الكتان
ماما اتغاظت منه كتير شهد عليه احمد وسمير
ربطت ايدهم في السرير ضحك كمان كل الجيران
مشمش قال علي نفسه حمار وابو قردان ركب منقار
قال انا عمري ما بدي قرار وجميعهم بقي ليه زعلان
وابو فصادة اشتري كيلو ودفع للتلجر ماله
قاله خد كل فلوسي فكر علي نفسه كسبان
و كإنه بقي م الشجعان
**************************
كثر خيرك
كثر خيرك كتر خيرك لما تحس بازمة غيرك
لما تشيل الجور عن طيرك لما يصون الحب ضميرك
كتر خيرك كتر خيرك
*******
كتر خيرك يا إنسان تطرح أرضك بالإحسان
تسعد صوت داق الحرمان وتنور بالبسمة مصيرك
**********
كتر خيرك لما تحس تقدر تزرع حب وبس
ولا لحاجات الناس بتبص والدنيا تفرح بزهورك
*********
كتر خيرك كتر خيرك
لما تمد اديك للغير لما تحب طريق الخير
لما يكون لك قلب كبير لو تهدي للكل شعورك
كتر خيرك كتر خيرك
**********