تويت
يلا حنا خوت
يلا حنا خوت
****************
يلا حنا خوت ف لحروف
وراضعين بزُّولة لقصيدة
لاش الضَّغينة ف الجُّوف
وشاهرين سلاح لمكيدة
شحال شفت ومازال كانشوف
شي ناصب ل شي لمصيدة
يآك كلها وحرفو وعلى قدعرفو
يلوحو لغا أو ف ورقة يستفو
تارة يهينو تارة يشرَّفو
تارة يتعتَّر كيما تعتَّر سالفو
وتارة يتوفَّق يكُون لحظَّ محالفو
لكبير ف لحرف يعفَّ
وعلى كلام لعيب يكفَّ
يسدي للصغير نصيحة ويساعفو
شحال من صغير كبر
تعلم يطرز لكلام ويهضر
يلا حنا خوت ف لحروف
نشيَّعو لمحبة بيناتنا
ولمحبة طريقها معروف
سامحني ونسامحك
را لموت يآخوتي كا اطُّوف
*****************
المريني ادريس
القصر الكبير بتاريخ : 05 / 02 / 2016