قبري يا قبري...تتمة
قبر ي...أنا اليوم بين يديك
حن اعْلي ربي ايخليك
البارح أنا كنت انطَل اعليك
واليوم أنا ابروحي باغي نفديك
الدنيا الفانية تضحك ليك
اتلبسك جوهر أُو ماس
وانهار اتموت تلعب بيك
المَال افلوس ولا شيك
مَعندهم قيمة...
انهار اللِّي تَبرد يَدِّيك
اقبل ما تَحتضر يا خويا
أنا راني انوَصِّيك
دير شي تجارة امع ربي
راه هي اللِّي غَادي تَخدم اعليك
صل،صوم،زكي واتصدق...
راه هذو هما مُحاميك
فين عَاد ،فين ثَمود
فين المَماليك...
فين قارون فين فِرعون
فين الصَّعاليك ...
خُوذ عِبرة من التاريخ
ومَا حَواليك...
رَاها البعوضة يَمكن اتقَرِّيك
الفيل لَمضَخَّم لما اطغا
گالتلو البَعُّوضة أنا نَعميك
الله الله على الحكمة...
إلى ما نَفعَاتك اتوَعِّيك
يا ربي فكرنا بالشهادة
النهار ادجيني وادجيك
اعلاش اتعَاديني وانعاديك
راه الخصُومة انهار
أُو القطيعة ديما بلا ما انوصيك
راه انهار اللِّي إِصَلِّيوْ اعليك
إگُولُو جَنازة رجُل
لا جنازة رَئيس ولا مَلِك
محمد مهداوي