طامعْ في الدنيا ليه

طامع بالدِنيِا ليه...هَا الدُنيِا دنيا فانية
بْتاخُدْ منّا كل شيء...بين اللحظة والثانية
لا تْفكر إنَّك حربوق...وتعملِّي حالَك مرزوق
لَمّا الدنيا بتعطي عليكْ...ياماْ من المر حتْدوق
لا تْفكِر وتظن ببالك...شكلت قَدرَك على موالَك
نصيحة لا تْطلِّع فُوق ...حال الناس أحسن من حالَك
خلّيك دُومَك عايِش يومَك...ولا تْفكر أنُّو بعلومك
ممكن تغيِّر شغلِة ببُكراْ...هَيْ قصة خارج مفهومَك
شايف حالَك بكِبْر قَدرَك...وأنت بُكرْا جُوَّا قبرك
ما رح قلَّك طاطي شوي...بُكراْ الزمن هوِ بدَبرَك
شايف حالَك أحسن من حالي...لَأنُّو معك شويِّة مصاري
وهِم ضيع قبلك كتير...وهَلَّق صرت أنت التالي
طمعك بهالدنيي شيلو...أحسن ما تعيشا ضلالي
لَرزقَك مو أنتى الحايش...لا تعيش ها الدنيِا طايش
الفقِر مو هوِ المشكل...هِيكْ عايِش وهيكْ عايِش
المِشكل هوِ أنَّك تْحوص...وبِين الناس تْحر وتْلوص
مو سائل على المبادئ...همَّك أنُّو تْجيب فْلوس
كل مين طمِع يا ويلو...عايِش نْهارو مِتل ليلو
داير ورا النِص فْرنك...متل قط عم بلْحق ديلو
لَمّا الدنيا بْتضحكْلَكْ...بْتضحك وبْتْصير فرحان
ولَمّا الدنيا بتْبَكِّيك...بْتِبكي وبْتْصير زعلان
مالَك مْلاحِظ يا فهيم...انُّو الدنيا أُلعُبان
شوَيِّة قهر وشوَيِّة نعيم...لازم يتْساوى الميزان
عامل بْها الدنيا همَّك...لِقْمة غِيرك على تِمَّك
محروم من صغر سنَّك...مو شبعان من بِز أمَّك
الدنيا ألَك مو لغيرك...خُود حِصْتَك وحصِّة غِيرَك
بس العبرة بالأواخر...لازم تدفع فواتيرَك
ليْل نْهار مالَك فاضي...عم تجمَع عِمْلِه وأراضي
بس يا ترى حسبْت حساب...لَوقوفك قدّام القاضي
كِلْمِة أخيرة رح قُولاْ...ويا ريتَك أنت تقولا
إستحالة هالدنيا تطولا...أمر ربَك كان مفعولا
وهالدنيا بعرضاْ وطولا ...عند الله الدار الأولى