تويت
على جنب يا أسطى
استوقفني بوست على الفيس بوك بيحكي حكاية واحد رايح يصرف معاشه..كان واقف طابور في عز الشمس.. وقع مات.. اتركن على جنب لأن الإسعاف رفض يشيل جثه..والناس واقفه عادي في الطابور مستنيه تصرف المعاش ..!!أنا مش هناقش هنا غلاء الأسعار.. ولا ضعف المرتبات والمعاشات.. ولا نظام الدولة الفاشل في طريقة صرفها.. بشكل لا آدمي.. خاصة لكبار السن وأغلبهم مرضى وذوي إعاقات.. ولا هتكلم على منظومة الصحة المزرية بأكملها.. من مستشفيات تقدم خدمة بائسة إلى حالات يائسة.. وهيئة إسعاف مترهلة.. تأتي بعد الهنا بسنه..ولا تقدم أي خدمة طبية ..لكن خدمة النقل السريع المجاني إلى الآخرة ..والتي تنص قوانينها من أيام حكم قراقوش بعدم حمل الموتى..لكن تركهم هكذا في العراء حتى يصل ذويهم ويتكفلون بذلك العناء.. أو يدفعون الفيزيتا لسائقي الإسعاف نفسه..!!
أنا حقيقة مايشغلني.. هي طبائع الناس أنفسهم ..أين ذهبت الشهامة والكرامة والنخوة والمرؤة.. إزاي الناس واقفه لسه متمسكة بالدور في الطابور..!! لا اله الا الله.. هو للدرجه دي البني آدم بقى رخيص كده.. محدش قدر يشيله ..فعلاً ناس عايزه الحرق.. وتستاهل اللي بيجرالها طالما الجنيه.. بقا ابقالها من الإنسانيه ..جحود وقسوة قلب وانعدام رحمة.. في قلوب ناس.. أكلها الجوع لحد مابقت تتفرج على نفسها ..وهي بتموت بدون لامبالاة ولا إنسانية..!!
على فكره هو مات فعلاً.. واللي واقفين طابور دول.. مستنيين دورهم فالموت.. هو فعلا طابور وكل واحد مستنى دوره يجى ياترى هيموت موته شكلها ايه..؟! هيموت فى قطر ..وألا مترو ..وألا غرقان.. وألا بيت واقع عليه.. وألا حادثة على طريق.. كل واحد ليه دور واللى دوره بيجى بيعدى..!! ده واحد كان واقف عاوز يقبض ملاليم يمكن عشان علاجه ..أو لأهل بيته..وربنا عالم بيه .. والحال بيصبح كل يوم أسوأ من اللي فات بسبب الحكومة الظالمة..لما يبقي راجل زى دا .. بينزل فى عز الحر عشان ملاليم ..لما إسعاف تيجي وتمشي وتسيب راجل مسن ميت ..مرمي جنب الرصيف.. كأنه كلب.. ولا ليه سعر ..ولا تمن ..يبقى نقول على الدنيا يا رحمن يا رحيم..عليه العوض ومنه العوض..!!
على فكره أغلب الى جنبه إذا ما صرفوش هايحصلوه.. الفقر يميت القلوب .. ماتلموش عليهم.. لوموا على اللي كان سبب في فقرهم وذلهم..شوفتو عملو فينا إيه..؟!
خلونا كلنا بنفكر في الفلوس ..ولو أخوك وقع جنبك مش هتفكر فيه.. !! هو ليه بقينا كلنا كده ..حسبي الله ونعم الوكيل في الظالم إللي خلاها كده ..زمان مكناش كده مع بعضنا.. كنا بنخاف على بعض ..ذنبه في رقبة الكبار.. اللي مش عارفين يوفروا عيشه كريمة لكبار السن.. الله يرحمه أكيد ربنا أحن عليه من الحكومه للأسف هي دي مصر النهارده.. لله الامر من قبل ومن بعد.. إن الله لا يغير ما بقومٍ حتي يغيروا ما بأنفسهم.
تعليق