تويت
العمر فات
*********
علشان تعيش
شهد الحياة
من أجل حاضر
يدهشك
ينعنشك
يفرفشك
انسى زمان
مليان قلق
متقلش لا
دا الكلام
موزون وحق
فجر يشق
ظلامنا شق
فاكر
واحنا صغيرين
قالوا لنا بكرة
حيبقى خير
يغرقك
ويروقك
تعيش حياة
كما الملك
والخدم مع الحشم
والجوارى ملك لك
ترَجّع العمر
اللى فات بالزمبلك
تخضب الشيب
اللى عشش فروتك
بالسواد
علشان تسود
وتكون أسد
تعيش كريم
من غير تعب
فضلت أحلم
زى غيرى
ستين سنة
أحلم معاها بالهنا
وانسى سنين البهدلة
دخلت بستان الوعود الحالمة
ومسكت بإديا السراب
وضحكت له
فكّرْت يولد الندى
من خطوته
لقيته فارد مطوته
وبسطوته دبح الامل
قالى صبرك ده جميل
من نوع فريد
علشان كده
ممكن تخوض التجربة
من أجل إيه؟
(مستقبلك)
رديت عليه
العمر فات
والجمعة كانت يوم تلات
سمعت خطبة الخميس
والشيخ خميس
قفل البيبان
قبل الاوان
كبر عليـّا أربعه
من غير ركوع
مفيش رجوع
لحاضرى
أو للى فات
سخر الممات
عملت ايه
أبكى عليه؟!
عاش الملك #
مات الملك #
كش ملك
Eid Khalil
9/4/2019