ياشاربة م النيل والمية شهد بزياده..
بيجرى الدم فى عروقك ويبقي بصمة وشهادة..
على انك من النيل شاربة قوة عزم وارادة..
......
عايدة يابنت مصر ياشاربة الوفاء م النيل..
أدب وطيبة وكرم وطبع محترم وأصيل..
نموذج لبنت مصر زهرة فى حضن النيل..
.....
صحيح شاربة م النيل حب الجمال والخير..
صحيح واخدة من ميته طبع الوفا للغير..
لكن كمان شاربة التحدى والعناد ساعة النفير..
.....
مصرية.. ولمصر تهدى الروح وتفديها..
ومهما تقسى عليكى لو طلبت بتديها..
طبع الأصيل كده يبنى لبلده لجل يعليها..
.....
عايدة ياشجرة الصفصاف مميلة ع النيل..
تهمسله بالغنا وتعزفله أجمل المواويل..
نيل مصر يللى فى دمى بتهدر كمثل السيل..
....
أفديك يانيل بروحى ودمى أنا منك كما منى..
وبعشق مصر وبعشقك يانيلنا إكمنى..
شربت الشهد بكفوفى وشيلتك جوا فى الننى..
....
عايدة يابنت مصر ياملكة شاربة من نيلها..
عاشقة ترابها ومهما تسافرى برضو بتجيلها..
ترمى حمولك فى حجرها وهى بتشيلها..
...
تسلم مصر هبة النيل لناسها وعبادها..
ويسلم لمصر ونيلها بناتها وولادها..
وعايدة بنت النيل وشطه بيتها وبلادها..
.....
جمال عمران فى لحظة على شاطئ النهر.
مودتى