[align=center]يا حنة حاسبي عالإيدين
دي حبيبتي لسه زهرة خضرة بتبتسم
ف عيونها مديت البساط
وجريت بقيدي وصوتي مجروح
والندا ينفخ ف كور الليل
ينور فرشتي
حلمي ابتدا من كام سنة
وحبيبتي كانت وردة نامت ف السنين
غسلت إيديها وجات تمليني الحروف :
ــ عديت وشفت الهوى بيصلي ف عيوني
زخرفت قلبي وقلت الزهد تكويني
هزيت رموشي ونار الوصل تكويني
هذي العروسة بتنقسم حرفين
وتطلع فوق ضلوعي وتبكي
تنقسم الدموع
فستانها أبيض م الشموع
والقلب قايد جوة صوتي
آه يا صوتي
كيف بترسم حلم أخضر
عرشها جواك بيسجد للعروسة
لفها بحزنك وصلي للنجاة
تاه قلبي
والبنت الصغيرة بالضفيرة هدت معالمه للطريق :
ــ عارف طيور الضحى والشجرة الحلوة
زي ابتسام الوله في ساعة الخلوة
هربت في قلبي الفيوض واحتجت للملوة
يا عروسة شاغلة في الفراغ بستان
وفستانها محيط
مدي إيديك وردي صوتي م الفراغ
لفي دراعط جوة طينتي
ونزلي دمعي
وأوعي تجرحيه
أحسن لهيب الأجنحة بتحرق ف خدي
وترتمي بين الإيدين
حرفين / سنين
مين يبتدي نوري ؟
ومن زوري يخش العالمين؟
ــ عزيت ف قلبي الفيوض وارتحت للمية
زوقتلك مدتي من كل لون مية
هزيت طيور الضحى طارت بحرية
الفجر نوّر
وابتدت روحنا تنام
وعروستي لابسه ف راسها تاج
زفونا ياللوا وافرشولنا الأبسطة
علشان دموعنا متنجرحشي من السنين[/align]