أنا مش بريء .. وهاعترف

باللي أنت عايزه بالتمام

هاقول وراك مش ها ختلف

وياك ف كلمة من الكلام

........................

...... ........

...... ..........

أنا الجاني على نفسي

وعلى بنتي وعلى ابني

أنا الهارب من الأيام

ومتستر على الأحزان

أنا اللي حلمت في سري

وخبيت في الضلوع يأسي

أنا اللي داريت على أمسي

وعشته مصاحب الكتمان

أنا اللي كتبت غنواتي

ودسيت بين سطورها آهاتي

وأنا اللي رسمت أوطاني

عصفورة على الأغصان

أنا اللي حلمت بالآتي

جريء الخطوة متعافي

بيشق السنين أنهار

وبيخرس لسان النار

ويدندن على الأوتار

غنواية أمل وأمان

أنا اللي نشرت فوق صوتي

شقا عمري في موالي

وأنا اللي بكيت على اصحابي

يوم صاروا طعام لحيتان

أنا اللي عملت لرفاقي

وأصحابي واخواني

بخوفي وضعفي وسكوتي

مناديل الوداع أكفان

أنا اللي قبلت أقول حاضر

وأسمح للي بيتاجر

...... بمصيري يقوللي كلام

بيلمع كما الأوهام

وهو حقيقي م الباطن

متعاقد مع الشيطان

......................

حاضر سعادتك

ها اقول كمان

...................... !!

....................!!

أنا قاتل عمر في الفجر

وأنا ف دمي خيانة وغدر

تلوث شط أكبر نهر

وأنا قاتل علي وعثمان

أنا اللي سرقت قفل القدس

وسلمته لولد صهيون

وأنا اللي فتحت باب بغداد

ف عز الليل لجيش شمعون

....................

؟؟؟؟؟؟؟؟

!!!!!!