أعذرينى

سميح عزت

أعذرينى ..

لو يوم لقانا .. شفتى فى عيونى الأمل

شجره غصونها أنين دموع

أو صوتى كان فيه الطموح

شايل كفن عمر الربيع

أعذرينى ..

الحلم متشعبط ف طوق بدن الحياه

وانا ف الحياه ..

منك وفيكى بتوه بضيع

***

أعذرينى ..

فى القلب كام شلال حنين

شلال أنين .. وغربتين

وكل غربه بدون رجوع

الأوله :-

أنا عشت فى حضنك غريب

غنوتى سبب اغترابى ..

مابين شطوطك والزروع

والتانيه :-

ف بلاد ماتحضنش الغريب

وانتى السبب ف الغربتين

وف انتحار ضى الشموع

يا أدفى حضن وأقسى حضن

يا أحلى مر وامر شهد

أعذرى القلب اللى ماقبلش الخضوع

أنا أصلى من نبعك شربت

إنتى اللى علمتينى أرفع راس غنايا

وارفض أكون إنسان مخنث أو وضيع

فكان م المستحيل أقبل أكون

راس تطاطى وتحت باطى

أشيل نتانة الانهزام ياام الربيع !

فهمينى ..

إزاى تعلمنى عنيكى كل معنى للشموخ

وتيجى عاوزه تجبرينى على الخنوع ؟!

****

أعذرينى ..

لو لقيتى ف ابتسامتى وش ميت ..

والرموش واقفين حداد

لو قريتى ف نن عينى

جملة عتاب بتقولى رجائى

خلى سلامك من بعيد .. لبعيد

لو لمحتى فوق جبينى

غصن شوقى ..

مال وإحساسى بليد

لو لمستى كف إيدى

وبين خطوطه التقيتى

ألف عام برد وجليد

غصب عنى ياحبيبتى

ماانتى رغم الآه حبيبتى

غصب عن قلبى الشريد

حاس انى ..

م الحياه ومنك طريد

والحقيقه كل ذنبى

إنى مره حلمت بيكى

وخدانى فى حضنك كأنى

لسه فى مهدى وليد

وانى لما حلمت بيكى

غنوتى كبرت ف صوتى

ولبست الوش العنيد

واما يوم سعموها منى

أعلنو إنى مشاغب باحو دمى

كأنى بضرب نبض قلبك بالبارود

****

أعذرينى ..

النهار مشلول ف قلبى

عجزى مش قادر يخطى

خطوه واحده ف اتجاهك

حتى لو حاولت أزحف

ألف رادع عند بابك

.................

................

أعمل ايه ....؟

يا أميرة عرش عمرى المستباح

قايضوا حلمى بالجراح

أعلنو نفيى وبيعك

شالوا من عينى الصباح

زرعوا ف النن النواح

غربونى ألف مره فى عيونك

****

أعذرينى ..

كل دمعة حزن عطشانه فرح

تطرح رحيل

كل لحظة خوف ورعب ف قلب أب

خاف عليكى وف ربوعك هام وحب

هى تركة لانكسار للألف جيل

أيوه مش قادر أكون ..

فارس الحلم الأصيل

الكلام ماعادش ينفع

فوق دماغى ألف مدفع

والألم أقوى وأبلغ

وقعت منك جوا بير المستحيل

*****

أعذرينى ..

آخر غنايا أوله ..

والغنوه فكت شعرها

على كتف لحن ..

ماعرفش مين هايكمله

اللى كتب لى هويتى

صفرين وشرطه ف دفتره

ولَّا ..

إبنى اللى لسه تاتا تاتا بعلمه

الأبجديه وكل ليله أسأله

وكأنه عارف سكته

فاهم وراسم خطوته

راح تعمل ايه ..

ووش بكره ازاى ياولدى هاترسمه ؟

يمسك قلم مكسور ويرسم شخبطه

حاجه كده زى الزمان متلخبطه

وجوا منها عيون كتير متسبله

ويقول يا ابويا الحلم إزاى ارسمه

والرسم ده بأى لون ألونه ؟

يصعب عليا وف عيونه الطيبه

أشوف مخاوفه وألف فكره بتهزمه

أخده لضلوعى .. أحضنه

واخاف اجاوبه والإجابه تضيعه

خايف أجاوبه والإجابه تضيعه !