صكوكك ياوطنى

صكوكك ياوطنى ..
بتضحك عليا وتقول لى هِيص
هتاخد قرارك ف بيع البلد دى
لجلن جرايه وحبة غُموس
وهاخد براحى ف بيعك ياشعبى
لهمك وغمك وعيشةْ التيوس
كأنك عايزنى .. أبيع طمى نيلى
وأرضى ونخيلى ..
وعمر اللى ماتوا ف أرض السويس
بنفسى لأنك .. رميتنى لجوعى
وجبت المهازل تغمس دموعى
وانت بتضحك .. مستنى الوص
بس انت شاطر وراسى وعاقل
ودايماً بتثبت .. إن انت فاهم
جبت الحكايه مراحل مراحل
آخرها هابعكم زى الجاموس !
****
صكوكك ياوطنى ..
بتمغُص ف بطنى بتلوى ف كبدى
برجع وبسهل وعقلى خلاص
داخل مراحل جنون البهايم
مفيص وهايم بيصرخ ياناس
رافض أعيش ..
كما طفل أهبل أبربر واريل
أنافق أوافق أغمى العيون
تعمل لى (سلبه ) كأنى حمار
أنهق وارفص .. عليا تدوس
وتقول عليا مجرد مشاغب
مخرف وعايب
ورافض (يدَرََّج) مابين (الإِلوس )
****
ياوطنى الحكايه ماهيش يانصيب
تصيب أو تخيب
دى ورقه وتمنها مايفقرش جيب
ياوطنى الحكاية أجيال هاتطلع
تلاقى وطنها .. جسمه ممزع
تلال م الجواعه ومليون خراب
دا إن كان وطنها هايفضل وطنها
وتفضل تكحل .. بطينه عيونها
مؤكد هايدخل يزايد الغريب
عليا وعليك .. وشعبك يبيع
لخنزير نصيبه فى حضن التراب
تراب البلد دى فجرب تعيد ..
مره وألف ياوطنى الحساب
غلطان تصحح هاصقف واقول لك
هاشيلك ف عينى ننى وحبيب
****
إمبارح سمعت المبجل وزيرك
بيقول علينا .. ده شعب واعى
مين اللى قال لك ..
الشعب كله مثقف وواعى ؟
واسمعنى مره ولو كنت ناسى
مجرد مثال وله ألف داعى
فيه ناس ع القهاوى هاترمى التماسى
وتسحب كراسى
وتقعد تراهن وتخسر حبابى
عيون البلدى .. وبكرة تلاقى
سكران بيكتب مبايعة بنصيبه
ف قناة السويس وبيملا جيبه
من غير مايسأل مين اللى شارى
تقول له يهودى .. ؟
يقول لك ده طيب وأصله ف جيبى !
ساعتها ها تطلع تخطب وتمنع ؟
طب ليه م البدايه ف الأصل تسمح
لنفسك تكرر مأسى خرابى
ركز معايا وفنط كلامى
الباقى منها هو اللى باقى
لما تبيعه مايعودش باقى
بعد اما خصخص دماغك كيانى
وباع منه ياما .. لكانى ومانى
إيشى أصفرانى وإيشى أبيضانى
تضمن لى إنك ..
هاتشتل لوطنى بإيدك تقاوى
لما تبيعه نزرعها تانى ..
تنبت لى مصر اللى نيلها ف كيانى ؟
طيب وحاضر مسلِّم وماشى
هازرعها فين جاوب سؤالى
فى عين إسرائيلى ؟
ولا ف ( سُنكى ) سلاح أمريكانى ؟
****
آخر كلامى أنا مش عبيط
وإيديا لسه معلم عليها ..
حبل الجاموسه وليف الغبيط
فلاح أرارى وبوزن كلامى
وتحت الطاقيه عادل دماغى
وفاهم وواعى ..
كل الحكايه هاتخلص ببيعى
لراشى وحرامى وواد أصفرانى
ففكر ياوطنى وفكر وفكر ..
لسه الحكايه فى إيدك وإيدى
لسه النهايه فى إيدك وإيدى
قبل اما ييجى ..
القرد يسرق .. نيلك ونيلى !!!
ولا انت ناوى تبيع انت راخر!؟
لولا الملامه لأمشى أصرخ
يالهوى اللى جانى !!!!!!!!!!؟