فى قبور قرية مصرية00 إلى اليمين القبور تتخللها أشجار عالية00 وإلى اليسار أراضى زراعية00 وفى الأعالي تبدو منازل القرية00 ونرى شخص يتجول وسط المقابر000 ويتمتم بكلمات00 ونفهم انه يقرا الفاتحة على الموتى 00 ويتوقف عند قبر معين ويظل يبكى ويجفف دموعه

الشخص

صحيح الفراق صعب قوى 00 عمري ما كنت أعرف الموت00 ولا بافهم معناه00 ليه لانى لسه ما جربتوش فى قريب منى 00 كنت صغير، وما عرفشى يعنى أيه موت00 عادى شخص يروح وما يرجعش وما عدناش نشوفه00 اى نعم مات ليا قرايب كتير00 لكن موتهم عادى بالنسبة لى00 يمكن عشان ما كانوش قريبين منى00 أو ما كنتش متعلق بيهم00 خالتي 00 خالي 00 عمى 00 عمتي 00 كل دول ماتوا00 ليه ماتأثرتش أو زعلت 00 احتمال عشان كنت صغير0وماعرفشى معنى الموت ولو كنت كبير يتهيألى كنت هاتأثر واعرف أيه هو الموت 00 وفعلا كبرت وعرفت بجد أيه هو الموت00 الموت شيء صعب جدا جدا ومن نعمة ربنا علينا اننا ننسى بسرعة 00 ولو ماكنش ربنا أدانا نعمه النسيان ، ما حديش عارف البشر كان هيحصل لهم أيه00 ومن نعمته عليااننى كمان نسيت وده بعد ما ماتت أمى وأنا عندي عشرين سنة00 وكان صعب عليا اوى أنى أتحمل الصدمة دى 00 لأنها كانت كل شيء فى حياتى وكنت متعلق بيها جدا 00 والصراحة عمري ما كنت أعرف طريق القبور00 اللهم إذا كانت فيه جنازة طالعة00 وأروح ماشى فيها ونشيع الميت لمثواه الأخير 00 دى كانت فكرتي عن المقابر00 لكن أمي 0لما توفت بقيت أعرف أيه هو الموت إزاى تبص حواليك وتلاقى أقرب الناس إليك ماتوا00 تخيلوا شكل الواحد يبقى إزاى00 ده من كرم ربنا إننا بنتحمل المصيبة دى 00 أمي تعبت فى أيامها الأخيرة وتطلب الأمر يتعمل ليها عملية جراحية00 سافرت مصر00 يادوب قعدت مدة وبعدين جاني الخبر 00 وكانت صدمة جامدة عليا وعرفت أيه هو الموت وساعتها ما حسيتش بنفسي 00 وحصل لي أيه00 ورحت فين وعملت أيه00 وكل ده ما دريتش بيه00 ولما فقت حسيت بالفرق00 لما أمك تكون معاك 00 ولما تبعد عنك للابد00 وما بقيتشى زائر عابر للقبور مع الجنازات00 لا بقيت أزورها باستمرار00 وأقرا الفاتحة على روح أمى00 وزى مانتوا شايفين عدت آجى باستمرار حتى لما كنت باذاكر كنت باذاكر فى المزارع اللى جنب القبور00 وكبرت وعرفت أيه هو الموت00 وبعدين مات لي صاحب غالى عليا أوى فى حادث أليم 00 زعلت عليه جامد00 وكل ما افتكر الأيام الحلوة اللى قضيناها مع بعض انفجر فى البكاء00 ومأقدرش أحوش نفسي ( يتجه ناحية اليسار حيث الاراضى الزراعية00 يجلس على النجيلية 0 )

وكل ما يكون الواحد مهموم أو متضايق آجى وأقعد فى المكان ده00 خلاص ما عدشى فيه رهبة القبور والخوف منها وبعدت فكرة انها مسكونة00 أو الحارس يكون واقف مستني يبعد اى واحد يقرب فى ميعاد موش مناسب 00 اى نعم الواحد كان بيحس برهبة لما كنا أنا واصحابى بنوصل صاحبنا مرسى اللى ساكن جنب المقابر00 على الرغم من انى لما كنت بامشى بالنهار ما كانشى الخوف ده عندي ( ينهض ويتجه ناحية المقابر 00 )

صوت مصطفى

يا جمال موش دى النهاية00 انت راجل مؤمن ولازم تعرف ان الموت علينا حق وكلنا هنموت00 ولازم يبقى عندك أمل والدنيا حلوة موش زى مانت متصور00 والطريق قدامك مفتوح00 دى موش نالعالم00 اتحدى00 انجح00 اثبت ذاتك

جمال

حاولت وانطلقت من طريق لطريق وما استسلمتش ونسيت فكرة الموت وأصبح عندي ذكرى00 ارتبطت بامى وأبويا وكنت أروح أزورهم بين المرة والتانية00 لغاية ما جه السر الالهى واتعرضت لأعظم حاجة ممكن يتصورها انسان00 وموقف لا يمكن يخطر لإنسان على بال وهو الموت 00 اللى كان عندي فكرة وذكرى لغاية مابقى حقيقة مافييش منها مفر 00 عشتها خطوة بخطوة00 والناس اعتبروني ميت وانا حى00 حديش عمره شاف واحد ميت وهو حى 00 كنت أنا عمال أقول أيه هو الموت لغاية ما لاقيت الموت قدامى والناس اعتبروني ميت وأنا حي 00 رحت أزور أخويا وحسيت بهبوط شديدوشويه تعب00 رحت فى غيبوبة طويلة وخدونى للدكتور

ص الدكتور

القلب واقف00 ما فييش نبض وجسمه بارد خالص00 الدم ما بيتحركش00 ما أقدرش اعمل لك حاجة

ص زكريا

يعنى على كده يبقى ميت

ص الدكتور

إكلينيكيا يعتبر ميت

ص زكريا

لا اكليكيا ولا روبابيكيا 00 انا عاوز أعرف أخويا جرى له أيه 00 حي ولا ميت

ص الدكتور

ومأقدرش أعمل لك حاجة 00 لأن الموضوع خرج من إيدى

ص زكريا

أنا هاوديه لأكبر دكاترة البلد 00 أنا هأجيب له كونسلتو

ص الدكتور

صدقني ماتحاولشى00 لأن أخوك مات بالفعل

ص زكريا

موش ممكن 00 موش معقول .00 ده كان كويس 00 انت اللى موتته

ص زكريا

أيه ياسيد00 أيه موتته 00 أنا دكتور موش قتال قتلة00 هو أخوك كان عنده القلب أو يشتكى من حاجة

ص زكريا ( يبكى ) لا عمره قال آه ولا عمره اشتكى من حاجة00 أرجوك ما تخبيش عليا

ص الدكتور

أنا إنسان قبل ماأكون دكتور 00 صدقني أخوك مات00 ولو موش مصدقنى الحق نفسك إن كنت شاكك واعرضه على دكتور تانى

ص زكريا

لا تانى ولا تالت00 إنا لله وأنا إليه راجعون00 طب من فضلك ساعدني عشان أطلع له تصريح دفن


_________________