سيدة الرقي والاصاله
وام الفوارس
تحياتي
وطرفه جديده في حضورك العالي

ههههه.....
-------------------------------
مرة واحد كان ماشي بهالشارع وداس على قشرة موزة وطاح فيها على ايده
فصار كوعه يوجعه .. راح لأقرب دكتور .. ولما دخل العيادة .. الممرضة قالت له
.... عايزين عينة من البول
هو استغرب وقال .. معقول .. شو دخل هي بهي ؟؟ .. مشان شو يعني ؟ .. أنا كوعي مخلوع
الممرضة قالت : تسطفل .. هادا النظام .. اذا في عينة بول .. ممكن تدخل للدكتور
ما في بول .. ما في دكتور
الزلمة ضرب اخماس بأسداس وانحرق حريشه .. وسلم امره لله .. وقال .. خلص مافي مشكلة
وبعد شوي طلع الدكتور مبتسم وقال : واضح انه الضربة قوية ..بس اطمن .. كوعك سليم مو مخلوع
المريض اتعقد .. وقال : طيب من وين عرفت انه كوعي هو اللي عم يوجعني ؟؟ أكيد الممرضة قالتلك
الدكتور: لا أبدا .. تحليل البول هو اللي بين كل شي .. أنا عندي جهاز جديد لتحليل البول بالكمبيوتر
بينعرف منه كل شي عن حالتك الصحية .. خود هلأ هالمرهم ادهن منه .. وبعد اسبوع راجعني .. ولا تنسى تجيب عينة البول معك
هادا راح عالبيت محروق حريشه عالآخر .. وضاربه فيوزاته .. وحكى للعيلة عن اللي صار .. وقعدوا يضحكوا على نصب الدكاترة هالأيام .. قال شو .. تحليل بول بالكمبيوتر ... شوف على هالسلبة .. شوف
بعد اسبوع كوعه خف تمام .. وقرر يروح للدكتور ... بس ابنه اقترح عليه يعمل مقلب بهالدكتور مشان يكشف احتياله ونصبه.. حاجته يسلبها على خلق الله .. من وين جايب هالنهفة .. تحليل بول بالكمبيوتر
قام الابن اخد عينة من بوله على عينه من بول اخته على عينة من بول ابوه
وحط عليهم شوية من زيت السيارة
وقال خلينا نشوف هالنصاب شو بدو يقول
اخد الاب هالخلطة العجيبة وراح للدكتور ووقت دخل عطاها للممرضة ... وقعد ينتظر
وبعد شي نص ساعة طلع الدكتور عرقان وماسك ورقة طويلة .. نتيجة التحليل
قام سأله بطريقة ساخرة .. ها ها ... شو لقيت يادكتور بالتحليل ؟؟
الدكتور : شوف .. هو واضح انه كوعك صار تمام .. بس في شوية نتائج غريبة
ابنك مدمن هيرويين .. وبنتك حامل .. ومحرك سيارتك لازمله تبديل
__________________
شو ها التشخيص الطبي
ههههه
وسامحونا

الدقة الغزاوية

مقدمة:
أهل غزة مشهورين بالفلفل .. وأكيد ما في طبخة أو أكلة إلا و في تركيبها الأساسي الفلفل .. و عرفوا على مر العصور بمحبتهم الكبيرة للفلفل وانفتاح شهيتهم لأكل الفلفل مع أي طعام .. وفي ناس إلهم خاطر ياكلوا مع الحلويات فلفل ..

السلطات:
من أنواع السلطات اللي انشهرت في العالم .. مثل السلطة التركية والسلطة المصرية والسلطة الغزاوية .. وأنواع تانية زي سلطة الطحينة وسلطة الملفوف وسلطة المايونيز .. .. وهي توضع على السفرة لفتح الشهية

طريقة عمل الدقة الغزاوية المشهورة ..
الدَقة << بفتح الدال .. ومشتقة من دق يدق دقاً .. دوق دوق دوق
أو بمعنى آخر ..
السلطة الغزاوية

قبل كل اشي بدك زبدية
أكيد ما في بيت فلسطين بيخلى من الزبدية الفخار..
واللي في غزة أكيد كل بيت فيه أقل شي زبديتين تلاتة ..
وللناس اللي ما عندها زبدية إحنا مستعدين نبعتلهم على البريد السريع زبدية
بس هما يتحملوا تكاليف النقل
وكمان مطلوب مدقة خشب..
مدقة حديدة ما بتنفع
مدقة عضم ما بتنفع
مدقة بلاستيك ما بتنفع
ولما نجمعهم مع بعض الزبدية والمدقة
مكونات الدقة..
أول وأهم عنصر من مكونات الدقة هوة الفلفل..
احنا بنحبها عبارة عن فلفل بطعم السلطة
بنحطش أقل من 10 قرون فلفل ..
طبعاً الفلفل على حسب الرغبة .. مش شرط يعني عشر قرون فلفل.. بس أكيد من دون فلفل ما بتزبط ..
وأكيد من مكونات الدقة البندورة ..
بكفي 3 حبات على الـ 10 قرون الفلفل .. أو برضو على حسب الرغبة
بصلة صغيرة أو نص بصلة وسط أو ربع بصلة كبيرة
معلقة عين جرادة ..
معلقة ملح..
زيت زتون..
جبنة بيضا .. للتزيين .. وممكن نستغني عنها..
زتون حب .. حسب الرغبة..
طريقة التحضير
يقطع الفلفل في الزبدية قطعاً صغيرة بس مش كتير بالسكينة طبعاً..
وبعدين بنحط معلقة الملح ..
وبعدين معلقة عين جرادة
وبنقطع البصلة إرباً إرباً ..
وبنمسك المدقة وبنبدا ندق ..
وبنستمر في الدق ..
.. دق دق ..
تعبتوا من الدق ..
لسة استمروا .. لحد ما يندق الفلفل والبصل كويس..
هلقيت بنقطع البندورة فوق الفلفل ..
وبنكمل مسيرة الدق ..
وكمان ندق ..
دق لحد ما تندق البندورة كويس مع الفلفل والبصل .. يعني البندورة بدها شوية هدوء في الدق وشوية تفغيص
و حسب الرغبة بنفرك الجبنة البيضا فوق الدقة ..
مش واحد يجيبلي جبنة فيتا ولا جبنة البقرات التلاتة اللي في الكرتون .. ما بتنفع
بتجيب جبنة بيضا بلدية..
وبنحط زيت الزتون ...
وبتتاكل بالخبز طبعاً مش بالمعلقة وولا بالشوكة والسكينة كمان
مع شوية زتون ..

طريقة الأكل
بتقسم الرغيف.. وبتبدا الهجوم..
تغرف .. تغرف .. لحد ما تخلص الزبدية .. وتصير تلحوس فيها ..
وبالآخر بقولكم ..
بالهنا وعالشفا ..
وسلملي على بواسيرك

هذه النكتة وصلتني على الميل

يعني ( منقولة )


أتنين متزوجين قرروا يروحوا يصيفوا على البحر

وبنفس الفندق يللي أضوا فيه شهر العسل من عشرين سنة

بس الزوجة صار عندها شغل

وما قدرت تروح مع زوجها و قررت تلحقه بعد عدة أيام

وصل الزوج للفندق

وكان عم يوضب غراضة بالغرفة

وبيتفاجأ بكومبيوتر محطوط عالطاولة

وفيه خط أنترنت

فخطرتله فكرة أنو يبعت إيميل لمرته يفاجأها فيه

ولما كان عم يكتب خربط بحرف وانبعت الإيميل لغير شخص

وصل لوحدة أرملة كانت راجعة من دفن زوجها

ولما كانت عم تفتح أيميلا

قرأت الأيميل المبعوت من الرجال

وصفرنت الأرملة فورا


ودخل أبنها عالغرفة وشاف أمه عالأرض لا من تما ولا من كما

والأبن اتطلع عالشاشه وكان مايلي

زوجتي العزيزة

وصلت بخير

يمكن عم تتفاجئي لأنك عم تسمعي أخباري عن طريق الأنترنت

بس هلأ صار عندون
كومبيوترات هون

وبيقدرالواحد يبعت أخباره للأحباب

ما صرلي زمان واصل

واتأكدت أنو كل شي يكون مجهز لوقت وصولك
لعندي الجمعه الجايه

أشتأتلك كتيييييييييير .... ومتشوق لشوفك

وبتمنى تكون رحلتك مريحة

متل ماكنت
رحلتي

ملاحظة : لا تجيبي معك كتيير أواعي لأنو كتيير شوب - جهنم

لا تتأخري

استاذ يسري راغب
السلام عليكم ورحمة الله وبركاته
ماهذه الروعة؟؟؟
الغريب اني كل يوم بادخل بالساعات
ودائما وابداً اكشتف اني آخر من يعلم...في كل شيء
والله اول مرة اشوف هذا المتصفح
ساعود في المساء إن شاء الله
وهادي نكته خفيفة عالأزواج
-----
وحدة ذهبت للقاضي قالت اريد الطلاق
قال القاضي هل ضربك؟-قالت لأ
قال الم ينفق عليك وعلى البيت؟ قالت بلى
قال هل خانك قالت لأ
قال اذا لماذا تريدين الطلاق
قالت
كل مايدخل ويخرج يرزع الباب ويقول ياريتك مكانه
ودمتم

أساتذتي الكرام بدون شك الترفيه أمر جميل
ولكن علينا ألا ننسى خصوصا في النكات التي تحمل طابعا لا أخلاقيا أو جنسيا
أن الاعتياد يميت القلب
والاعتياد أمر مفروض علينا في الشارع والإعلام والمدرسة والعمل
ولكن ما نستمتع به هو اختيارنا
ولم يبق لنا من الإيمان إلا أضعفه وهو الإنكار بالقلب
فلماذا نميت إيماننا بأيدينا