عم تسأليني بموسم العشاق
أيّ هديّة بحبّ تهديني
وإن كان قلبي ع الوصل توّاق
ونار الوجد والشوق تكويني
بدّي يا حلوة تبرّدي الحرّاق
ومن نبع ريقك دوم تسقيني
ما عاد بدّي لا ورد وطباق
نفسي شفافك دوم ترويني
ما بريد منك لا هجر وفراق
ولا ناس تدخل بينك وبيني
وقضّي أوقاتي بلهفتي مشتاق
ناطر ع ضوّ القمر تيجيني
قوللك يا حلوة هالعمر سبّاق
والشيب صار اليوم يغزيني
يللا نقضّي هالعمر في عناق
وتبقي ع جنبي وما تسيبيني
وكل ما بعدنا قلوبنا تشتاق
ضمّك لصدري وقول دفّيني
ولما بينعس لحظك البرّاق
تقولي تعبني السهر غفّيني