طراطيش الم فوق الاسفلت اللى ماشى عليه
مسكت فيا
والالم شبيط بيمسك الجسم مايسبهوش
ميلت قلبى ع الرياح
احدف وارتاح
واملى وافضى
بذور الشبيط زادت خصوبتها ف قلبى
لاقادر احرقة
ولا عارف اعمل له ايه

انا خدت كفوى م الشمتانين شماتة
ودلقت قلبى ع الطريق حتت
ووجعت نفسى كدب وزيف
وفردتها ع الطرقات
ملمهاش غير عجل العربيات الماشية
حتى اللى كانو عاملين احباب
غسلو ايدهم ف دمى
اتخانقو على جمجمتى
مين ياخدها يشرب الويسكى فيها


طاقة الامل المفتوحة اودامى
جنب الشمس بحتة
وطوفان م الحزن مغلفها
ياما اروح لها
تحرقنى الشمس
ياما امشى وافتها


موجوعة ليه عليا ياما
مانتى اللى فردتى طريقى قزاز وشوك
وانتِ اللى مديتى مشرطتك
وخلعتى قلبى
ومديتى ايدك ونهشتى كبدى
واما كفنتينى بالضلمة
ودفنتينى ف اليل يدارينى
طلع الصبح ينشر فضيحتك ع الملاء

سمايا مافيهاش ولا بذرة مطر
ولا راضية تحبل بالغيوم
الشمس فيها اتون
ارضى محرقة
ومبرقالى بحدة
ماقدميش اختيار لعالم تانى
دا اقصى ماتقدر ترسم فرشتى