بليل في حفلة زار
ضاع الحجاب مني
قلبت كل الدار
العين كده تصيبني
لسه معايا الفاسوخة
و حظي عاجبني
و البخور في البيت
و كفي متحني
و الست مبروكة
بتجيلنا و تغني
تعمل عروسة ورق
و ف عين مرات عمي
تخرمها بالدبوس
و انا لسه مستني
امي بتملي الطشت
و بتدبح حمامة عليه
و بإيدها فيها الدم
تغسل لأبويا إديه
و يالهوي برق و رعد
لما الفانوس يتكسر
البيت بمية ورد
يوم الخميس يتغسل
.........................
و مراية اختي حنان
رمينا عليها ريحان
ملفوف ف ملاية
مرسوم عليها كلاب
و كسرنا كباية
عشان عاوزة تتجوز
من إبن عم حسين
و امي مش راضية
و قاعدة بتبوز
و قالوا عندها عمل
فالست مبروكة
ملتلها الحلة
بحنة مفروكة
و إدتها تشربها
عشان تشيل السحر
و ترضي عليها امي
...........................
بيتنا بقي مجنون
خايف من الشيطان
و أُمي تدق الهون
و تقولي يا ملعون
هتقلب علينا الجان
لما أجي اتكلم
و اقول انه حرام
و الله الكلام ده حرام