الشعر يا ابن الناس مهوش كلام مسجوع
او كلمتين بجناس حلوين بصوت مسموع
الشعر يعنى شعور بالام وحيرة الناس
ومعاة يهون الخطر والمشى فالممنوع

*******************
انا اللى ف سباق المشاعر قلبى فاز من غير حكم
من غير لاسبورة وكتاب او حتى كراسه وقلم
وف عززهوه بالانتصار والفرحه ملياخ والامل
قاله زمانه صحيح عبيط من امته كان بنا عشم

*********************
الزم حدود الادب يا عندليب وقتك
مش كل قول يتسمع يا روح وعين خالتك
تنطيط وخبط وهبل الاسم بتغنى
يرحم زمان الطرب ويسد حنجرتك
*********************
صوابعى طول عمرهم قيدين شموع حواليك
مصابيح هدى لسكتك ونجوم سما ف لياليك
ولما شمعه انطفت تلعن ضيا الباقين
اه من سنين عشتها بس ما تمرت فيك
**********************
حكمك يا قاضى الهوى ظالم وهستانف
راضى على قسوتك بالذمه طب تحلف
لومرة فات الهوى على قلبك القاسى
لعرفت ساعة القضاتحن او تعطف
*********************
عاصى وفجاة اهتدى قام حب بتوضا
ويصلى حتى الجمع واهو فرض يتقضى
قام شده واحد رزل ع القهوة وهمسله
اقعد يا فالح بقى دا السبت النهارده
********************
عيان بقى لى سنه والعله مسكانى
ياما قولت انام اعتذر النوم لاجفانى
سالونى اهل الدوا والطب عن حالى
قلت الحليوه بعد وبعت قال انسانى
*********************
على ظلمتك يا ليل ياما قالو فيك اشعار
اللى يقول دا كحيل واللى يقول ستار
قرداتى واهل الهوى او حتى كوديه زار
والبخت لو ينعدل لاتقول بياض وسمار
*******************
يا ابو الشموس الدهب و الطير على الاشجار
الكل قال يا ليل لم حد قال يا نهار
ولاحد شاف ثورتك او قال نهار غيار
خليك على بسمتك يكفيك غنى الاطيار