صابرين

صابرين بتحصد من شفايفى قمح للناس الغلابه

صابرين بتحلب قلبى للاطفال حليب

صابرين بتدخل فى الوريد

توسعلى شريان الأورطى

بدون جراحة معمليه

صابرين عافيــــــــــــــه

زى طين الأرض ... زى الحروف الأبجديه


مدخـــــــــــل

لمى ابتهاجك واضربى الرمل بودع

مارسى الدجل

زهرى ورد البدع


( مفتتــــح )


الباب قزاز

والشرفه ضل الشيش

بجمع حروف الابجديه

وانده عليكى مالقاكيش

ضميت غرامك

وابتسمت لضل صوتك عاللغه

مارست حلم المنتهى وعشق النهى

وأنا اللى كاتب ضل صورتك عالنشيد

وأنا اللى راسم ضل صوتك فى البريد

وأنا اللى خليت للغرام فى عنيك عيد

( 1 )

ضميت غرامك واللغه

..اتعلمتنى الاغنيه

وضيعتنى الامنيه

وأنا كنت آخر حلمها وفارس هواها فى الغرام

وأنا كنت احلامها الجســام

وكنت فارسها الوحيد

لما انتهيت ......... ماقدرتش ابدأ من جديد


( 2 )

السيده ..

سيدنا الحسين ..

القلعه .. ضل المشربيه

....بارود غنوة عيال الحاره طالبين الجلاء

النيل صديقى فى الصباح

..النيل خليلى فى المساء

ليـــــــــــــــه إنتى واقفه عند حد الاغنيه

..وغاويه البكاء

الابجديه لسه فيها حروف كتير

مش بس واقفه عند حد ( ألف وبــــاء )

يمكن اكون همجى بصحيح

لما حلمت بان ايدى تجيب نجوم نجف السماء

لكنــى لســه

باحلم باسرار اللغه

ومحطمانى الابجديه

وبخاف شروع ضل الخيانه

ولســـه بحلمنى وفـــــــاء


( 3 )


مكتوب غرامك أبجديه عالحجر

وعلى النشيد دمع الوتر

وعلى الطريق ... الارصفه

جوه الجناين وردتين

تحت الشجر ضل وجنون

مجنون بحبك يامها

والأبجديه الآبهه

..عصيانى .. رغم اللى مابينا من غرام باعـــــــه المدا

مدد وريده فوق اساطين الكلام

الناس فى غفله وليل طويل

واحنا كبرنا فى السلاسل

واحنا بواسل

( بس فى حدود الكلام )


( 4 )


ضمينى وانتى سارحه فى حروف الكتاب

مافيش نصيب يجمع مابينا

غربه وجمعهم عذاب

طالت ليالى الوعد إمتى ياضحى

ضمينى وانتى مروحه

يابهيه لمى الدمع نيلك لم يمد

ولم تدور فى الغيط سواقى

ايه اللى باقى

علشان نمد الحلم فوق الارض طمى


( 5 )


واجب فراقنا

وإفتراقنا

موت طبيعى

للطبيعى فى الحجر

فى التكوينات البلوريه

للدموع فى عيون قزاز


( 6 )


الشمس تفرد عالمدا

تغرز ضميرك فى الوشوش

قلبك فانوس

لعيال حوارينا اليتامى

والايامى

والارامل

والعوانس

واللى شمسه فى المغارب تنكفى

تطلع له فى الاحلام شموس


( 7 )


النيل يمد الاورده

تطلع عيال السيده

بتحب اطفال الحسين

تشبه عيال بحر البقر

تكبر تحن لصوت إيـزيــس

ترسم بشارة حلم ( عمرو )

تغنى غنواية بهيه

تعلن الثوره اللى فيا

وتغنى فوق قبر الشهيد

يابلادى يابلادى

السراير فوق سريرى

لجل مانجب لك شهيد

احنا للموت اتوهبنا

وإنتى للاحلام نشي

ديابلادى يابلادى

السهر ليلك عباده

احنا فرسان وانتى غاده

مفطومين قبل الولاده

رضعنا حبك فى الوريد

يابلادى يابلادى

احنا اشواقنا انتحار

وف هواكى احنا الكبار

اطلعى لنا انتى نهار

الشهاده يومها عيد

يابلادى يابلاد الشوق متاهه

احنا ارض انتى سماها

بكره نتنسم هواها

ونطلقك فى الكون بخـــــــــــــــور

يــــابــــلادى // يـــــابــــلادى