ولا قصرك كان عالي
ولاجنا حينك كانوا طوال
جاي في عب النيل جاى طوالى
وشراعك قصير يا حزين
وعينيك من زمان مجروحين
كل ما يشفيهم عكار الميه
يجرحهم دمع الحنين
كام مره تروح وتاجي
وكام مرة يحبل قلبك بالفرحه
آه يا قلبك لما ينادي
بعرف إن اللحظة تحت لسانك مالحه
وبعرف إن وشوش الناس
معدومة معدومة وكالحه
وتروق مهما تروق
ويكبر نباتك الدودة تهاجمه
وفى راسك وسواس السسبانة الطارحه
و ما تطرح السسبانه يا خي
هتطرح ايه غير ورقات ناشفين
غيرشي أنت بس الحساس
وجبينك طايله الضي
وقلبك ده بشوفه وش هادى الملامح لكن بيعاني
وساعات بشوفه مرسوم بالهموم
يمله ويفضي ويمله ويفضي
وكأنه مواني
وأنا كل يوم بكلم صحابي عنك
وعن لحظات العراك وعن لحظة التسامح
ولما باخد وبدي مع نفسي
بتظهرلى إيدينك على سطح الميه
مفرودين وأنا أقول إيدينك عراض يا بي
أيدينك عراض يا حزين
لكن سمر وسمارهم زين
وصوتك يطلع من عمق الميه صافى وجوين بيقول
أنا قلبي مواني
ومراكب فارده القلوع إن هبت ريح أو إعصار
أنا قلبي مفهوش عكار
أنا قلبي فنار لما تطل الشمس تملاه سطوع

شعر / أحمد عبد الحميد محمود