الرمل على الشط
شبعان شمس وهوا
والبحر بيغسله كل يوم
وأنت قلبك
كيف رمل الشط
وكيف سما
من غير غيوم
سيبك من الخلق
ومن الهموم
وخلى الناس
تشوفك زى ما أنت
وخلى اللى يعتب يعتب
واللى يلوم يلوم
وما تحلمش
تكون حد تانى
من وطن تانى
أو أرض تانية
حد جانى أو أنانى
أو مفتاح سعادته جنوح
إستسلم للدنيا وراخى
جناحاته زى
طير مدبوح
الدنيا أكلت
منه وشبعت
خلى نظرك لقدام
أنت عينيك
من شيل الهموم تعبت
ما أحبش أشوفك كامش
واخد نفسك
وقاعد على جنب
زى اللى عايز
يعيش على الهامش
وين صوتك الهادى
وين وجهك الصبوح
فين قلبك الطاهر
فين حلمك الطموح
ما أنت اللى
علمتنى أحب الناس
و قلت لى الحب م الدين
وأنت اللى من سنين
علمتنى البساطة وقلت
إن البساطة روح
و قلت لى أتعلم أقرى وأكتب
وماأبقاش غامض دا زينة
الرجال الادب والوضوح
إمبارح شفتك فى الحلم
واقف على الميضه
و الميه نازلة من الغسل بيضه
أنده لك تبصلى وتبتسم
وأنا أقول لك فينك من سنين؟
وأسألك هتاجى تانى؟
جاى مع الجايين؟
تبصلى وتبتسم
وأدعي لك بطول العمر
و اللقا فى الجنة
وشجرة حنة
وقصر ياقوت
وشاشك أبيض وين ماتروح
وأنا المجروح من بعدك
ألملم نفسى من غبار الدنيا
و أتمنى أشوفك تانى
فى أقرب وقت