يسعد صباحك يا قمر نيسان يا اللي ع طلّ الفجر عم بتلوح
تعودت شوفك ع الصبح نعسان وريحة عطر ع جوانبك بتفوح
بصفن قبالك والقلب هيمان وما يعود فييّ لا إجي ولا روح
ومن بعد ما إصحى من السهيان بيظلّ طيفك في خيالي يلوح
ناطر تا شوفك بعدني قلقان مدري شو صارله هالقلب مشفوح
صفّيت عاشق بالهوى ولهان مجنون ليلى بالعشق ملووح
بقطع فيافي الهجر والحرمان دوّر ع ليلي والقلب مجروح
قلّك يا حبّي هالعمر لو كان من جديد يرجع والأمل بيلوح
تا ظلّ فتّش واسأل العنوان ع أبواب قلبك تا المحبّة تفوح
نشرب سوا من كاسنا المليان حبّ وغرام وتندمل الجروح
ما عود إترك خصرك الفتّان ودوّر في صدرك ع سفينة نوح
مدري يكون إنتهى الطوفان وما عاد يرجع هالغراب يلوح
وترجع حمامة حاملة أغصان تحمل بشاير والسعادة تفوح
بقضي الليالي ع الأمل سهران بلكي بشوفك وتنتعش هالروح