تويت
بحب الحكومة واحب الزعيم
واحب الحرامي واحب اللئيم
واحب المفتَّح واحب البهيم
واحب اللي يعمل لشعبه كمين.
دا الحب عندي ما يعرف حدود
ضارب بجـدره لحد الجدود
أبوس الأيادي وابوس الخدود
ولو حزني يبسط، راح اعمل حزين.
عشت ف حماكي انا راضي وذليل
وبوزي في رجلي موطِّي أصيل
لا بارفع ف عيني، ولا مرة اميل
وجوّة حيطانك دا قلبـي كسير
عرفت السعادة وشفت الوفـا
على إيد ولادك وضرب القفا
وروحي في حبك ما تعرف جفا
دا حب الحكومة في قلبي كبير.
بحبك وبادعي يا ريتني أموت
عشان المحبة لغيـري تفوت
وياخد نصيبه على دا السكوت
ويلبد في رجلِك ويهريها بوس.
هاهتف وانادي بأعلاها صوت
بحبك بحبك ولو كنتِ حوت
ولو يجلدوني بجزمة وبوت
دا الجبن عندي حياة النفوس.
تعليق