شفت مرة عربية بحمار
مكتوب عليها كلام حكم وكلام اشعار
وكلام عن عذاب القبر وعذاب النار
وكلام عن الجنة والعمل الصالح والابرار
وكلام عن المعاصى واسترها يا ستار
وكلام عن المعاملة وادب الحوار
بين الصغار والكبار
وكلام عن الكراسى والمناصب والدنيا كاس دوار
وعليك تتعظ يا ابن ادام وبكرة فية جنة وبكرة فية نار
واذكر الله وقول لاالة الاالله واستغفر الغفار
وكلام عن الحسد وخمسة وخميسة مرشوقة
فى ضهر العربجى وف رقبة الحمار
مبقتش عارف دى عربية بحمار ولا نشرة اخبار
عليها تاريخ مصر المعاصر وعليها اشكال والوان
وعليها اهم انجازات البلد وصورة كبيرة لى ابتريكة الفنان
ومكتوب تحتها امبارح وبكرة الاهلى فى اليابان
ومكتوب عليها الحلوة تفاحة للسفر وللسياحة
متقلش مشغلها اسكندرية اسوان
قولت فى سرى الشعب المصرى شعب غلبان
ومكتوب عليها كلام فى السياسة وفى الفلسفة والاقتصاد وفى البورصة كمان
ومكتوب بالخط العريض احسبها يا انسان والبنى ادم ملوش غير لسان
والكبير كبير وياما فى الحبس مظاليم
وحب الناس تحبك تعيش فى امان
والوطن زى الام لازم يكون فى حنان
وكلام عن حكومة بتستخدم مع شعبها اسلحة الدمار
وكلام عن حالة الناس وكلام عن الاحتكار
وكلام عن التعليم اللى بيخرج بعد عشرين سنة
بنى ادام بهيم مع احترامى للبهايم والحمير
وموت وانت رافع راسك احلى ما تعيش جبان
واوى تكون عبد الا للرحمان
والحمد لله وكدا رضا وتمام واقل من كدا كمان
بقى نفسى اجيب كل وزير
واشاور له على العربية وعلى الحمار يقرا الكلام
روحت كلمت العربجى بقوالة انت عامل اية وكاتب كل دة لية
قالى احنا بلد الكلام وانا صحيح عربجى بس فى الاصل فنان
والعربية بيتى وسكنى واهلى لا مؤخذة الحمار
عبد الحميد بدوى