ههههه مساكي سكر يا سحورة الجميلة
نعم يا عزيزتي أصبح الإبتسام جنون
وربما اعتبره البعض" قلة ادب من غير سبب"
أتذكرين يا عزيزتي
قانون الفتيات فى عبور الشوارع والممرات بناء على رغبة العائلات
" بنت .... عيب"
"الضحك من غير سبب قلة ادب"
" تمشي فى الشارع زى الألف , زى نبوت الغفير واحيانا يقولونها صريحة.. إمشي زى الراجل"
هههه نعم اذكرها جيدا تلك النصائح
واه حين نضبط متالبسين ونحن نسير بالشارع نبتسم ونجن نتحدث وتتعالى اصواتنا قليللا ونحن نتجادل فيما فعله الاستاذ اليوم فى الفصل
وكيف عضتني زميلتي
ولكزتني اخرى والخ والخ
فعلا يبدو انه لا نمفر يا عزيزتي
اما وصمة الجنون
او وصمة التفاهه والإسفاف وقلة الادب
لكن والله ما بتفرق معانا الأسماء
سأظل أبتسم دون سبب
وسأدندن اغاني فيروز بهمس وانا امشي وحدى على الكورنيش
وسأضحك لو جه القمر وانا اطالع السماء واتعثر بطريقي لأقف مرة أخرى
سأهدي سواق التاكسي ابتسامه وانا امنحة اجرته وسأغلفها بدعوة لطريق آمن
وسأمنح البقال ابتسامة وانا اطلب منه كيلو من الحليب او باكو بسكوت محشو بالبندق
سألاعب الصغار فى الطريق وهم يتأبطون ذراع ابائهم وامهاتهم
سأضحك للقطة دون ان افزعها
سأبتسم للهواء
وليذهبوا بكل ظنونهم للجحيم!!
هههه شكلي هعمل ثورة
ابتسمي يا عزيزتي
فالصورة بإبتسامتك اكيد ستصبح أحلى وأحلي
وماذا يتبقى منا سوى صورة يعلقونها على احدى الحوائط
ويلقون علينا سلاما كلما تذكروا ان هناك حائط من الأصل
تحياتي لتواجدكِ الذي يسعدني دوما احلى سحورة

الحمد لله ، فات بكرا
لكن بكرا ما بيجيش
بكرا وخداه الخفافيش
بكرا خلاص
اتحصن جوا شبايبك الحكام
بكرا كأنه اللعنة
مسروق من عمر الايام
راح يجى ازاى
و أنت وهو بعاد
وانت هو على معاد
طريقك مش هوطريقه
لا هو طايقك
و لا أنت كمان بتطيقه
ديما متخانقين
ديما مش متفقين
على كلمة
تجيبك و تجيبه


أستاذة رشا
جميل هذا الهم اليومى ، من صبيحة ربنا حتى نزول الليل
جميل و لو أنه بيشوف بالعين الصعب
ومش بيشوف ازاى العرق الغالى بينزف على رغيف العيش
مش شايف عمال المحلج
و الغزل المغزولة صدرهم بالسل و وجع الراس
لكن معقول
لو كان الهم حاجات من تلك
فالله يرحم هذا العالم و يحرق كل الناس الهلك

و الله ياستى ما عارف اقول ازاى
و انا شفت الحارة
وحديت الجارة
و كمان
الوادزكريا بن رمضان الفحل
شايل منديل العيش
ودوغرى راح على الورشة
و كمان لهفت عينى عربية
الست لواحظ
بتقوم من نومها الضهر بعيون منفوخة
و تروح الشغل يدوب قرب الفجر المفضوحة

وحاجات
وحاجات

تسلم ايدك ست الناس
على كل حروفك
و يارب تكون البسمة
بتعلع ديما
و لا ساعة تفارق بلكونتك
أو حتى تغيب عن ................................ نا حروفك !!

استاذه رشا
شر البريه ما يضحك وفعلا الضحك اصبح محتاج ثوره علشان نرجعه زى الاخلاق وكل قيمه حلوه غابت من عالمنا
بس اسمحيلى ارى كل الناس تتهم الزواج بالنكد وانه سبب النكد فى الشارع والمواصلات ابدا النكد تواجد مع غياب الضمير وانعدام الوعى بخطوره غياب الضمير
تب خالينى انسانه متفأله وهضحك تب هضحك لوحدى منا كده هبقى مجنونه
تعرفى حضرتك انا قررت القرار الرائع اللى حضرتك اتخذتيه انك تبتسمى لكل شئ
لقول الحبيب المصطفى
تبسمك فى وجه اخيك صدقه
حقا الابتسامه بين الناس تزيل ويلات من الغضب والمشاحنات
الابتسامه مرطب للمشاعر الغاضبه الثائره
ولما خرجت للشارع ومستعجله وعايزه اروح شغلى تخيلى صف من عربات يسد الطريق قال ايه حمار معترض انه يلف امام مخبزفطائر تعرفى صاحب المحل يخرج تقريبا كل انتاجه كعرض فى الشارع ولا يترك فرصه للعربات او الماره هو وجميع المحلات فى نفس الصف داعبه فطيره انف الحمار مد رأسه وتشمشم بها فضربه صاحب المحل فغضب الحمار وثار
وصارت معركه حاميه بين صاحب المخبز وصاحب الحمار والطريق معطل وعقارب الساعه لا ترحمنى والغيظ كل الغيظ بجنباتى وطبعا انا وعشرات الماره
كيف اضحك واخرج حتى ابتسامه
شعرت بالهزيمه والنكسه العارمه ولكنى صممت اذهب لعملى بالرغم من تأخيرى ووصلت لعملى وقد غيبنى المدير ولم يسمح لى ان ارجع بيتى كيف اضحك اليوم خلص وقلت لما اروح لازم اضحك روحت وعايزه اصلى الظهر قبل ان يؤذن العصر واول شئ عملته قولت اتوضأ واذا بى افتح صنبور مش هقول المايه قطعه لا محنا حلينا المشكله ومش بتقطع خالص علشان فى موتور بس الماء يا جماله رائحه لا تطاق ولونها عجب قولت باردو هصلى يعنى هصلى وجبت زجاجه ماء من الثلاجه وتوضأت وانا اصلى هناك فرح بنت الجيران بعدينا بشارعين الا اذا صاحب الدى جى كان عنده ضمير اوى ومشغل سمعات ايه تسمع مصر كلها اقرأ الفاتحه ونانسى ترد فى اذنى استغفرو الله وبعدها موسيقى راقصه مرعشه ياالله ماذا افعل اغلقت كل شئ حتى استطيع الصلاه
واقول ايه ولا ايه جيت اضحك لقيت التلفزيون اه من اللى فى التلفزيون ياخبار ناس هايصه ومبهدله الدنيا والشباب يا اخبار ناس لايصه وحالها يغم ومش عارفين نعمل لهم ايه
فضلا عن المجتمع وقضايا المجتمع بس عارفه باردو هنضحك مش بنعيش لحظه حلوه الا لحظه الضحك
وطبعا لحظه عمل الخير
تقبلى استاذتى مرورى ومدخلتى البسيطه
مرفت عاصم

أشكرك لى مشاعرك الطيبة يا سيدي
وصدقني كلنا خائفون
نعود لمنازلنا بعد يوم عمل طويل ونفتح الباب ونحن نقبل يد المفتاح "كحرامية الحلة" ونخطي بقدمنا اليمني ونردد"ربنا يستر..... يا ترى طابخين ولا هتبقى غدوه زى وشهم"
ونغادر منازلنا صباحا بدلا من ان نقول دعاء الخروج من المنزل ونستبشر بيوم طيب
تجدنا نهرول على السلالم ونعبر الطريق ونحن نردد" إستعنا على الشقا بالله"
اعرف انها دعوات جميلة لكن لماذا لم نفكر بإستبدالها
فنقول اللهم اجعله يوم خير
واجعل صباحنا لبن حليب
وتلك التعبيرات التي تفتح النفس
أظننا نستطيع ان نغير كل الوان الكآبه فقط لو أردنا
نحن كسالى يا سيدي
وبصراحة أكثر "إحنا بنستهبل"
تحياتي لمروك الطيب الذي أسعدني

ال أستاذة ال
وحياة حبيبة الصغيرة.... ترحمني من أستاذة دى يا طيب
بص قولي يا بت انتي اى حاجه اللى تشوفه حضرتك
ماشي حضرتك
ولا تحب اكتب طلب على ورقة دمغة حضرتك؟!

وبكرا ايه اللى انت جى تقول عليه
مش لما نبقى نعيش النهاردة ونلاقيه

تعرف يا سيدي الجميل
أظن ان السر فى "بكرا"
كلنا ننتظر" بكرا"
نتحمل هموم "النهاردة"
وزحام الطابور ده
وخصام النهاردة
وخنقة الحر ده
نتحمل كل أوجاع النهاردة
واحنا بنكلم المرايه ونقول" يمكن بكرا أحلى
يمكن بكرا نهدى
يمكن بكرا نرضى
يمكن بكرا لما.... نكبر
لما نعلى
لما تطرح الأرض
لما نبيع الأرض
لما الدنيا تشتي
لما الشمس تطلع
كلها أحلام ببكرا


وبكرا زى النهاردة
والنهاردة مالووووش نهاية
شكله باين من البداية
يوم زى كل يوم
ضله مغيم فى المرايه
بوسة فوق خد الجميل
او ألم فوق خد قفايا

بس لسه فى ناس عايشه بتضحك.. وتفرح .. وراضيه
احنا بس اللى طامعيين
عايزين كل حاجه تكون بجمال الحلم
مجانين؟؟؟ يمكن
شكلي "بهرتل"
وحروفي مني واقعيين
تدوملي طلتك الحلوة يا أستاذي
وتدوم لأحبابك وأصحابك بضحكة حلوة تفرح قلوبهم وتملى العين
تكرمني دوما بطيب تشجيعك
تحياتي يا زارع الربيع الجميل

تسلميلي يا ست الكل
انتِ الأستاذة
أسعدتني جدا مداخلتك الجميلة الثرية
وجعلتيني اشارككِ يومك الصعب لكنكِ منحتيني بسمة وانا أراقبكِ هناك
وكنت أهتف من خلف الكواليس
هيا يا مرفت لاتهتمي أكملي المحاولة ستنجح هههه ظلي حاولي سيدتي
أظننا سننجح
سلمت روحكِ ودامت بسمتكِ

استاذه رشا اشكر اهتمام حضرتك بردى
وابشرك خير انا حليت المشاكل اللى تقابلينى اثناء ذهابى لعملى وبطلت اروح الشغل واعدت فى البيت ههههههههههه
ايه رأيك فى الحل دا
اه والله اتكلم جدا المهم احب اضيف ملحوظه هنا بالنسبه لثورتنا لاسترجاع الضحك المقصود بها استرجاع الامل فى كل لحظه نفقد هفيها فى موقف معين او ازمه معينه
حبيت اوضح لان الموضوع مش نضحك لمجرد القهقه لا
عارفه
فى نكته سبحان الله كل ما اسمعها اضحك
اضحكك معايا
واحد كان اعمى فجأه فجاه.... لقى نفسه فتح من فرحته اتشل
ههههههههههه
بالهنا
مرفت عاصم