جنب الحيطه

عشت وشفت كتير وقليل
وقابلت كتير ناس قناديل
قبل ماشفهم زارني الليل
قال يمكن تحتاج ل دليل
قالت عيني طريقنا طويل
شوف لك غيره يكون لي دليل
غطيتها بسرعه بمنديل
وجعوا دماغي كتير قناديل
قال إيه فكر
بص وقدر
حل ودبر
ياخي وجعوا دماغي ب أساطير
ناوليني ياستي الجلابيه
وهاغطي دماغي بطاقيه
لحسن عقلي يشوف لي قضيه
والعكننه تتلم عليه
وف يوم والقناديل مطفيه
قال لي دليلي شوف لك حيطه
واوعى تروح لو تسمع زيطه
قلت يالِيلي عهد عليه
وفضلت امشي جنب الحيطه
واهرب لو يوم أسمع زيطه
وباكسر دايما قناديلي .. والباقيين يبلعهم ليلي
يوم وانا ماشي .. نادى عليه
جاري وقال لي .. حوش حراميه
قلت أنا مالي
سيبني ف حالي
أربي عيالي
يوم والتاني خطفوا جيراني
مابقاش ليَّ غير الحيطه .. وبس دليلي
وباكسر دايما قناديلي .. والباقيين يبلعهم لِيلي
قلت ف عقلي
متهيألي
أنا وعيالي
حالي ومالي
أعيش متهني
جنب الحيطه
ولا يوم تاني هاسمع زيطه
صرخوا عيالي .. خطفوا الحيطه
ودليلي متلف ف زيطه
كشفوا عينيه
مين جار ليه
فين قناديلي
خانِّي دليلي
خطفوا عيالي
مالي وأرضي
راح فين عرضي
ياما قالتلي
كتير قناديلي
وباكسر دايما قناديلي

مجدي راشد