تويت
قانا-30 تموز 2006
ماما...ليش بتكذبي علي؟
أول ما بلش الضرب و الكصف (القصف) قولتيلي يومين و بوقفوا...
علي مات...قولتيلي انو فيي ألعب معو بعد الحرب...ماما ليش كذبتي علي؟
ماما...قولتيلي انو الضيعة أمان و ما بدن يدربوها (يضربوها) لأننا مش مكاومة (مقاومة) و ما فيها مكاومة...
بس كذبتي
دربوها و مات علي...
قولتيلي رح نبئى (نبقى) بالبيت...بس هيانا ماما ركبنا بالشحن الصغير...
و جعنا ع التريأ (الطريق) ...و عتشت(عطشت) و ما في مي (ماء)...
كذبتي ماما...قولتيلي اننا مش رح نجوع و نخاف...بس كذبتي ماما...
و دربوا الشحن اللس قدامنا ماما...تتذكري يا كذابة؟؟؟
و ماتوا جيرانا ...قولتيلي اني رح أنام عندن بالجنينة (الحديقة الصغيرة) ...
بس الجنينة انحرقت و هني ماتوا...
و لما وصلنا ع صور ماما...هاي السفن لما سألتك شو هيي..قولتيلي هاي سفن للمسافرين ما بتكصف...كذبتي ماما...
هاي سفينة كبيرة فيها مدفع...كصفت البيوت و الترآت(الطرقات)
آخ لو بابا هون...كان طخن(رماهم بالرصاص) كلن...كلييتن(كلهم)
بف بف بف...ماتوا...هييييييه....تاخ تاخ تاخ...موتواااااااااا
بس حتى بابا...ما رجع
و كل ما أسألك عنه تسيري (تصيري) تبكي و تقوليلي راجع...
يا كذابة...وينه هاه وينه؟ ايمتن(متى) راجع؟؟؟
و لما رحنا ع كانا(قانا) قولتيلي انو البيت اللي حد الجامع ما بيكصفوا...
لأنو في حدو جامع و هادا بيت للمعاكين(المعوقين)
بس ماما حتى بهاي كذبتي...
ماما وينك؟؟؟مش وعدتيني انك ما تتركيني زي ما تركوني علي و بابا؟
كذابة ماما
انت كذابة...
ماما سامعتيني...ليش تركتوني لحالي؟
أنا مين إلي بعدك ماما؟؟؟
ماما اشتقتلك...كتييييييييييييير
*********************************************
قانا- 30 تموز 2007
...هلا صار مارق ( مرّ ) سنة عاليوم اللي صارت فيو المجزرة...
تذكرتي ماما؟
تذكرتي اما كونتي توعديني بالأمان؟
و لما كنت أتخبى فيكي من الطيران؟؟
ماما...أنا كبرت سنة...كبرت سنة و إنتي بعيدة...و علي و بابا بعاد...
و جيراننا كمان...و الجنينة المحروقة
و كل كتبي و ألعابي اللي راحوا بهيديك الليلة...
بتتذكري كديش كذبتي عليّ ليلتا؟ (تلك الليلة)
و تقوليلي ما تخاف ما تخاف...و تاريكي انتي اللي خايفانة...
ايه ماما...انا ابنك اللي كذبتي عليه و حاولتي توهميه انو بأمان...
حاولتي تنسّيني انو في صهيوني طاير بسما قانا و بدو يقصفنا...
إيه يا إمي....وينك هلا؟
وينك؟تعي شوفي بلدنا شو صار فيها...
البيت تعمر يا ماما...و انا نجحت بالمدرسة...
و هياني ماما بوقف ادام قبرك و قبر بابا الشهيد كل يوم...
و بقرالكون الفاتحة...و بترحم عليكن...
و كمان بقراها لعلي و جيراننا...
و حتى الجنينة ماما...حتى الجنينة رجعت اخضرت و كبرت ماما...
بس يا ماما....صحيح انا فرحان بالبيت و بالجنينة و عيلتي الجديدة...
بس يا ماما خايف...خايف من دونك و حاسس اني وحيد بهالدني..
ماما...انا عارف انك ما رح ترجعي...بس نفسي ماما نفسي تسمعيني و انا عم احكيلك...
ما رح سامحك لانك كذبتي علي...و تركتيني لوحدي هون...
ماما....اشتقتلك...
ماما نسيت اسالك...قولك رح يكون في مجزرة تالتة بقانا؟؟؟؟
تعليق