الطريق
الدمعة جريت ع الطريق
تترجا فيه ياخد بايدها
فضل يبوس اكعاب احذية المومسات
عن انه يديرلها وشه
او يداريها ف جلبابه الترابى
الدمعة فضلت تدحرج
لما وصلت لراس الطريق
من غير ماتعدى على عنيه
الطريق طلع بدون عيون

المطر سايب على ارض الشوارع
زحمة
بحور من دم
سالته ليه؟
قالى السما بتيكى علينا
والناى الحزين
قلت لنفسى اخدها عوم
فى سكة الدوامة والتايهين
اشرب كاسين هم
مانا كدة غرقان... غرقان
ف الاحزان

كل خطوة ليها ع الطريق علامة
الا خطوتى
رفض الطريق يديها اى اهميه
لان ريحتها فقر
ضحكت ف عبى
وطلعتله تعبان الحاوى
فاتنى الطريق
وطلع يجرى
والا انا اللى بجرى ع الطريق

حل الطريق شعره الاسود
خصلتين بيض ف وسطه شوهوه
حاولت افهم منه
قالى دى اشارة عبور
مريت ع الطريق
من غير مافتح بقى

الطريق اللى ودا
غير الطريق اللى جاب
والخطاوى اللى عدت
قفلت كتاب العمر
اول السكة شوك
واخرها ضلمة ومر