تويت
قصة بنطلون الجينز وشروال جدي
عامر عثمان/سوريا
( 1 )
بمرة من المرات
زرت جدي
وقلتلّو هاي
آم قلّي مين هاي
قلتلو ولو يا جدي
أنا عم اصبح عليك
آم قلي الله يرحم " السلام عليكم والمرحبا "
قلتلو معليش يا جدي هدا عصر اللغات والسرعة
وعصر النت والشبكة العنكبوتية
آم قلّي حتى العنكبوت
صارلو عصر عشنا وشفنا
( 2 )
وبمرة من المرات
سألني جدي وأنا راجع من الكلية
شو هادا اللي لابسو يا جدو
قلتلو ولو يا جدي هادا بنطلون الجينز
آم قلّي والشروال من شو بيشكي
قلتلو ولو يا جدي صار موضة عتيقة
آم قلّي طيب يا جدو وليش شعرك منكوش
شو ما عندك مشط ولا ما عندك وقت
قلتلو ولو يا جدي
هاي موضة سوبر ستار
وبرنيطة العم توم
آم قلي الله يرحم أيام العكال والكوفية
( 3 )
وبمرة من المرات
رن الموبايل وأنا مع جدي
آم سألني مين يا جدو
قلتلو زميلتي بالكلية
آم قلي الله يرحم ستك
يللي ما شفتها غير ليلة عرسها
( 4 )
فصارت الدمعة تنزل على خدو لجدي
وآم قلي يا جدو
خليك لابس الشروال متل ما كنا نلبس
بس الأخلاق والعادات لا تتركها
كلّو صار موضة قديمة
حتى الصدق والأخلاق
صارت موضة قديمة
و قلتو عنا متخلفين
ولك يا جدو
ما بدنا التقدم يجردنا أخلاقنا
( 5 )
وبعدها قلتلو لجدي
لا تزعل ولا يهمك
أنا شخصياً
من بعد اليوم
راح أترك بنطلون الجينز
وأشق البرنيطة
وامشط شعراتي
وماني لابس
غير شروال جدي
والعكال والكوفية
الرياض / 26 / 3 / 2009 م
تعليق